Россияда вагнерчилар мотами, Украинада мустақиллик байрами. Уруш суратлари

Украинадаги урушнинг 547-куни ўтди. Асосий маълумотлар:

Пентагондагилар Евгений Пригожин катта эҳтимол билан ҳалок бўлганини айтишди. Владимир Путин ва Рамзан Қодиров ҳам вагнерчилар раҳбари вафоти юзасидан ҳамдардлик билдирган.
The Wall Street Journal газетаси АҚШ расмий шахсларига таянган ҳолда, Пригожиннинг бизнес-жетига бомба ўрнатилган бўлиши мумкинлигини ёзди. Ғарблик мулозимлар фикрича, самолётни йўқ қилиш буйруғи Путин томонидан берилган.
Алексей Навалний Пригожиннинг самолёти ҳалокатини «Путин уюштирган теракт» деб атади.
Володимир Зеленский Украина самолёт ҳалокатига алоқадор эмаслигини билдирди. «Бунга кимнинг алоқаси борлигини ҳамма билиб турибди», — дея қайд этган Украина президенти.
Shot телеграм-канали терговчилар самолёт шассисига портловчи қурилма ўрнатилгани ҳақидаги версияни ҳам кўриб чиқаётгани ҳақида хабар берди. «ВЧК-ОГПУ» аноним канали маълумотига кўра, ишда биринчи гумонланувчи пайдо бўлган — Пригожиннинг шахсий учувчиси Артем Степанов.
АҚШ украин болалар Россияга депортация қилингани туфайли «Артек» ва Рамзан Қодировнинг онасига қарши санкциялар қўллади.
Украина разведкаси хабар беришича, Қрим соҳиллари яқинида қайиқлар ва авиация кучлари ўртасида тўқнашув рўй берган. Россия нашрларига кўра, украиналик диверсантлар ҳалок бўлган.
Россия қўшини Днипродаги автовокзалга ракета зарбаси йўллади. Ўн киши яраланган. РФ мудофаа вазирлиги «Украина қуролли кучларининг қарор қабул қилиш маркази»га зарба йўлланганини маълум қилди.

Евгений Пригожин ўлими ҳақидаги хабарлардан кейин Россияда нималар бўлмоқда?

23 август куни кечқурун Твер областида Евгений Пригожинга тегишли бўлган хусусий самолёт қулаб тушди: бортдаги ўн кишининг барчаси ҳалок бўлган, улардан уч нафари — экипаж аъзолари эди. Росавиация маълумотига кўра, «Вагнер» ХҲК раҳбари ҳам йўловчилар рўйхатида бўлган. Пригожиннинг ўлими ҳали ҳам расман тасдиқланмади, самолёт ҳалокатига нима сабаб бўлгани ҳам маълум эмас — бунга самолёт бортига бомба ўрнатилгани ёки ташқаридан ракета зарбаси берилгани сабаб бўлиши мумкин.

Твер области Куженкино қишлоғи яқинида Евгений Пригожин самолёти қолдиқлари
Марина Лысцева / Reuters / Scanpix / LETA

ФВВ ходимлари самолёт ҳалокати қурбонларидан бирининг жасадини қопга солиб олиб кетмоқда
Дмитрий Лебедев / Коммерсант / SIPA USA / Vida Press

Санкт-Петербургдаги собиқ «ЧВК Вагнер Центра» биноси олдида ташкил этилган мемориал олдида йиғлаётган аёл
Дмитрий Ловецкий / AP / Scanpix / LETA

«Вагнер» ХҲК ёлланма жангчиси Новосибирскда ташкил этилган мемориал олдида
Владимир Николаев / AFP / Scanpix / LETA

Петербургдаги собиқ «ЧВК Вагнер Центра» биноси олдидаги мемориал
Дмитрий Ловецкий / AP / Scanpix / LETA

Путин ва «Алеша» танки экипажи Кремлда

Владимир Путин Кремлда Бешинчи қўшма қуролли армиянинг 127-мотоўқчилар дивизиясидаги «Алеша» танки экипажи билан учрашди. «„Алеша“ танки экипажи Украина қуролли кучларининг сон жиҳатдан устун кучлари билан жангга киришиб, устун келди, шунингдек, зарбага учраган танк экипажи ҳаётини сақлаб қолди», — дейилган Кремл хабарида. Тўрт танкчи ҳам Россия Қаҳрамони унвони билан тақдирланган, улардан бирига — «Жасорати учун» медали ҳам берилган.
Михаил Климентьев / Спутник / Reuters / Scanpix / LETA

Донецк ўққа тутилиши

24 августга ўтар кечаси Украина қуролли кучлари Донецкка зарба йўллади, деб хабар берган RT телеканали ҳарбий мухбири Александр Пискунов. Унинг сўзларига кўра, ҳужум вақтида кассетали ўқ-дорилар билан зарба берилганда эшитиладиган товушлар қулоққа чалинган. Вишневский номидаги шифохона корпусларидан бири ва дўкон шикастланган. Донецк шаҳрининг Москва томонидан тайинланган мэри Алексей Кулемзинга кўра, ҳужум вақтида тинч аҳоли вакилларидан бири ҳалок бўлган. Украина томони Донецк ўққа тутилиши юзасидан изоҳ бермаган.