Давлат харидларига кичик тадбиркорлик субъектларини жалб этиш бошланади

“Давлат харидларига кичик тадбиркорлик субъектларини кенг жалб этиш ва уларни қўллаб-қувватлаш чора-тадбирлари тўғрисида”ги президент қарори лойиҳаси эълон қилинди.

Давлат иштирокидаги йирик корхоналар билан кооперация (ишлаб чиқариш кооперативи) асосида ташкил қилинадиган кичик тадбиркорлик субъектларини шу жумладан ногиронлиги бўлган шахслар, аёллар ва ёшлар тадбиркорлигини давлат харидларидаги иштирокини янада рағбатлантириш орқали янги иш ўринларини яратиш имкониятларини кенгайтириш мақсадида Иқтисодиёт ва молия вазирлигининг 2024 йил 1 январдан бошлаб давлат харидлари махсус ахборот порталида “Кичик бизнесга мадад” саҳифасини ташкил этиш ҳақидаги таклифига розилик берилиши мумкин.

Шундай тартиб ўрнатиладики, унга мувофиқ:

“Кичик бизнесга мадад” саҳифасида давлат иштирокидаги йирик корхоналар билан кооперация (ишлаб чиқариш кооперативи) асосида ташкил қилинган, шунингдек, қуйидаги мезонларнинг бирига мувофиқ келадиган кичик тадбиркорлик субъектларига ўзлари томонидан ишлаб чиқарилган товарларни 2025 йил 31 декабрга қадар давлат буюртмачиларига тўғридан тўғри шартномалар асосида сотишга рухсат берилади:

а) ногиронлиги бўлган шахсларни доимий иш билан таъминлагани бўйича - ходимлари умумий сонининг камида 50 фоизи ногиронлиги бўлган шахслардан иборат ҳамда уларнинг асосий иш жойи бўлган ва мазкур шахсларга тўланган иш ҳақи умумий меҳнатига ҳақ тўлаш фондининг камида 50 фоизини ташкил қилиши;

б) аёлларнинг доимий иш билан таъминлагани бўйича – раҳбари (директори) аёл киши бўлган, ходимлари умумий сонининг камида 50 фоизи аёллардан иборат ҳамда уларнинг асосий иш жойи бўлган ва мазкур шахсларга тўланган иш ҳақи умумий меҳнатига ҳақ тўлаш фондининг камида 50 фоизини ташкил қилиши;

в) ёшларнинг доимий иш билан таъминлагани бўйича - раҳбари (директори) ўттиз ёшдан ошмаган (ўттиз бир ёшга тўлмаган),  ходимлари умумий сонининг камида 50 фоизи ўттиз ёшдан ошмаган (ўттиз бир ёшга тўлмаган) ҳамда уларнинг асосий иш жойи бўлган ва мазкур шахсларга тўланган иш ҳақи умумий меҳнатга ҳақ тўлаш фондининг камида 50 фоизини ташкил қилиши шарт.

Бунда, “Кичик бизнесга мадад” саҳифасидаги кичик тадбиркорлик субъекти бир молия йили давомида жами 10 миллиард сўмгача қийматдаги шартномалар тузиши мумкин ва мазкур шартномалар давлат харидларининг электрон тизими орқали электрон тарзда тузилиши белгилаб қўйилади.

2024 йил 1 январдан бошлаб 2026 йил 1 январга қадар “Кичик бизнесга кўмаклашиш маркази” МЧЖ ёрдамида ишлаб чиқилган кичик бизнес лойиҳалари доирасида олиб кириладиган асбоб-ускуналарни суғурталаш, хомашё ва материалларни сертификатлаш харажатларини Экспортни қўллаб-қувватлаш жамғармаси маблағлари ҳисобидан қоплаб бериш тизими йўлга қўйилади.

2026 йил 1 январга қадар “Кичик бизнесга мадад” саҳифасидаги кичик тадбиркорлик субъектлари ва бюджет буюртмачилари билан тузиладиган шартномаларда олдиндан тўлов миқдори бир миллиард сўмгача бўлган харидлар бўйича 50 фоиз, бир миллиард сўмдан юқори бўлган харидлар бўйича 30 фоиз этиб белгиланади.