Полшада Николай Коперникка тегишли бўлган 500 йиллик артефакт топилди

Полшада машҳур астроном Николай Коперникка тегишли бўлган 500 йиллик циркуль топилди, деб хабар беради Daily Mail.

Мис қотишмасидан тайёрланган циркуль ҳаваскор археологлар томонидан топилган. Ишқибозлар ушбу кашфиётни георадар ёрдамида XIV асрга тегишли Фромборк қалъаси ҳудудини сканер қилиш вақтида амалга оширган.

Айнан шу ерда астроном ўзининг асосий кашфиётларини амалга оширган, шунингдек, коинот марказида Ер эмас, Қуёш жойлашганига оид назариясини такомиллаштирган.

Таъкидланишича, ушбу циркуль Ян Матейконинг «Коперник. Худо билан суҳбат» картинасида тасвирланган. Артефакт охирги 500 йил давомида қалъа боғлари ичида ётган.

«Николай Коперник ўзининг астрономик кузатувларини амалга оширган боғдан XVI аср бошларига тегишли циркулни топдик», — деб ёзади Treasure Mission гуруҳи.

Ўз навбатида ҳаваскор археологлар мутахассисларга мурожаат қилган бўлиб, улар топилган циркулдан астрономик тадқиқотлар учун муҳим бўлган аниқ ўлчовларда фойдаланилганини тасдиқлаган.

Афсоналарга кўра, астроном Коперник қалъадаги шахсий хонасига боришда махфий туннелдан фойдаланган. Ушбу циркуль айнан шу ердан топилгани айтилмоқда. «Циркуль Коперникнинг ўзига тегишли бўлган бўлиши мумкин», — дейди Николай Коперник номидаги музей эксперти Зоряна Поленик.

Коперник 1520 йилда Тевтон ордени билан юз берган урушда Полшадан қочиб кетган, аммо кейинроқ қайтиб келиб, «Осмон жисмларининг айланиши ҳақида»ги китобини ёзган. Коперник меҳнатлари унинг ўлимидан кейин, 1543 йил мартида эълон қилинган ва уни замонавий илм-фан оталаридан бирига айлантирган. 1616 йилда эса католиклар черкови Коперник ишларини бидъат дея ҳисоблаб, уни тақиқлаган.

2008 йилда ДНК-тест орқали қалъа пойдевори остидан топилган скелет астрономга тегишли экани тасдиқланган. Олимнинг қолдиқлари қалъа соборига қайта кўмилган.

Топилган циркуль Полшага экспертиза учун юборилиши режалаштирилган.