Рютте ХХРни «РФнинг Украинага қарши уруши шериги» деб атади

НАТО бош котиби Марк Рютте 17 октябр, пайшанба куни Брюсселда Украина президенти Володимир Зеленский билан қўшма матбуот анжуманида Пекинни Россия агрессиясига ёрдам беришда айблади. «Хитой Россиянинг Украинага қарши урушининг ҳал қилувчи шеригига айланди, у ўз манфаатлари ва обрўсига таъсир қилмасдан туриб, Иккинчи жаҳон урушидан бери Европадаги энг йирик можарони давом эттира олмайди», деди у НАТО мудофаа вазирлари билан учрашув ҳақида журналистларга ҳисобот бериб. Ҳинд-Тинч океани минтақаси мамлакатларидаги ҳамкорлар ҳам иштирок этган мажлисда Украинадаги вазият муҳокама қилинди.

НАТО Пекин билан муносабатларини қайта кўриб чиқиши керакми, деган саволга у Хитой алянснинг душмани эмас, деб жавоб берди. «Хитой — чақириқ. У бизнинг рақибимиз эмас, лекин бу чақириқ: у Россиянинг ҳарбий саъй-ҳаракатларини қўллаб-қувватлайди, санкцияларни четлаб ўтади, икки томонлама маҳсулотларни етказиб беради ва бу Хитойнинг дунёдаги мавқейига таъсир қилади», — деди Рютте. Унинг сўзларига кўра, Пекиннинг бу позицияси бошқа мамлакатларни бу борадаги фикрларини ўзгартиришга мажбур қилмоқда.

Марк Рютте Украинани НАТОга қабул қилиш муддатини очиқламади 

НАТО бош котиби Марк Рютте Украинани алянсга қабул қилиш бўйича аниқ муддатни айтмади. 16 сентябр куни Брюсселда бўлиб ўтган матбуот анжуманида у НАТОнинг Вашингтондаги аввалги саммити якунлари бўйича ишлаб чиқилган резолюцияга ишора қилди, хусусан, Киевнинг евроатлантик интеграцияси йўлининг «қайтариб бўлмаслиги» ҳақида гапирди.

«Вашингтонда НАТО Украина учун НАТО аъзолигига йўл очишга (ортга қайтариб бўлмайдиган тарзда), қарор қилди», дея ахборот агентликлари Рютте сўзларидан иқтибос келтирмоқда. Унинг қўшимча қилишича, «келгуси қадамларни қандай қўйиш ва уларни қандай қилиб муваффақиятли қилиш»ни тушуниш учун иттифоқчилар ва Киев билан «яқиндан алоқада» бўлиб турибди.