АҚШ суди Маскнинг сиёсий лотереясини тақиқламади

Пенсилвания суди миллиардер Илон Маскка АҚШ президентлик сайловлари олдидан иккиланаётган штатлардаги сайловчилар орасида 1 миллион долларлик лотерея ўтказишни тақиқламади. 4 ноябр, душанба куни умумий юрисдикция суди судяси Анжело Фолетта Маскнинг адвокатлари пул олувчилар тасодифий танланмагани ва «пуллик вакиллар» эканини айтганидан кейин лотереяни тақиқламасликка қарор қилди. Судянинг қарори рамзий маънога эга, чунки лотерея президентлик сайлови куни, 5 ноябрда якунланади, дея қайд этади dpa агентлиги.

«1 миллион доллар олувчилар тасодифан танланмаган. Бугун ва эртага ким эълон қилинишини аниқ биламиз», — дейди миллиардернинг адвокати Крис Гоберт. Лотереяни бошқарадиган Маскнинг America PAC ташкилоти директори миллион доллар олувчилар «ўз шахсиятини ҳис қилиш ва уларнинг қадриятлари America PAC» билан мос келишига ишонч ҳосил этиш учун олдиндан текширилишини таъкидлади.

Аввалроқ Филаделфия шаҳри округ прокурори Ларри Краснер Маскнинг сиёсий лотереясини «миллий сайловларга ҳақиқатда таъсир кўрсатиш учун мўлжалланган» фирибгарлик деб атаган ва уни тўхтатишни талаб қилган эди.

Кремл Илон Маск ва Путин ўртасидаги мунтазам мулоқотни рад этди

Кремл Ғарб ОАВнинг Россия президенти Владимир Путин америкалик миллиардер Илон Маск билан мунтазам алоқада бўлиб туриши ва ҳатто ундан Тайван узра Starlink'ни фаоллаштирмасликни сўрагани ҳақидаги хабарларини рад этди.

«Йўқ, буларнинг барчаси ҳақиқатга тўғри келмайди, яъни бу The Wall Street Journal'да чоп этилган мутлақо ёлғон маълумотлар», деди Россия президенти матбуот котиби Дмитрий Песков 25 октябр куни журналистларга.

Аввалроқ The Wall Street Journal (WSJ) АҚШ, Европа ва Россиядаги бир қанча амалдаги ва собиқ амалдорларга таянган ҳолда, миллиардер ва Доналд Трампнинг тарафдори, америкалик бизнесмен Илон Маск 2022 йил охиридан бери Россия президенти Владимир Путин билан мунтазам алоқада экани айтилган мақолани чоп этган эди.

Нашр суҳбатдошларига кўра, Маск ва Путин шахсий ва бизнес мавзуларини, шунингдек, геосиёсий зиддиятларни муҳокама қилишади. Газетанинг таъкидлашича, Маскнинг Кремл билан алоқалари ҳақидаги маълумотларни, афтидан, ҳатто АҚШ маъмуриятида ҳамма ҳам билмайди. WSJ суҳбатдошларидан бири АҚШ расмийларига Маск ва Путиннинг алоқалари ёқмаслигини айтди, бироқ Оқ уй тадбиркорга ҳеч қандай эътироз билдирмаган.