Висконсиндаги мактабда юз берган отишмада уч киши ҳалок бўлди

Висконсин штатининг Мэдисон шаҳрида хусусий христиан мактабида отишма юз берди. Маҳаллий ҳуқуқ-тартибот идораларининг 16 декабр, душанба куни маълум қилишича, қуролли ҳужум натижасида уч киши ҳалок бўлган, яна етти киши ҳаёт учун хавфли бўлмаган енгил жароҳатлар олган.

Полиция маълумотларига кўра, отишмада гумон қилинган ўсмир ҳам ўлик ҳолда топилган. У шу мактабнинг ўқувчиси эди. Маҳаллий полиция бошлиғи Шон Барнс матбуот билан суҳбатда ҳужумчи ўз жонига қасд қилган бўлиши мумкинлигини тахмин қилди.

«Бугун нафақат Мэдисон учун, балки бутун мамлакатимиз учун қайғули кун», — дея Барнснинг сўзларини келтиради AP. Журналистларнинг сўзларига кўра, тергов гумонланувчи 9 мм калибрдаги тўппонча ишлатган бўлиши мумкинлигини тахмин қилмоқда.

Отишма содир бўлган мактаб — Abundant Life хусусий мактаби. У ерда жами 390 нафарга яқин бола таҳсил олади.

Воқеа ҳақида изоҳ берар экан, Висконсин губернатори Тони Эверс шундай деди: «Биз болалар, ўқитувчилар ва бутун Abundant Life мактаби жамоаси учун дуодамиз. Янги маълумотларни кутяпмиз ва тезкор хизмат ходимларидан миннатдормиз». Оқ уйнинг билдиришича, АҚШ президенти Жо Байден отишма ҳақида хабардор қилинган.