Муҳаммад Салоҳ фаолиятида иккинчи марта АПЛ энг яхши футболчиси бўлди

Мисрлик футболчи 28 та гол урди ва 18 та голли узатмани амалга оширди.

Фото: АПЛ

«Ливерпул» ҳужумчиси Муҳаммад Салоҳ Англия Премиер-лигасида (АПЛ) мавсумнинг энг яхши футболчиси деб топилди. Бу ҳақда АПЛ сайти хабар берди.

Мисрлик футболчи Премиер-лига тарихида ушбу совринни иккинчи марта қўлга киритган бешинчи футболчи бўлди. У илк бор 2017/18 йилда мавсумнинг энг яхши футболчиси бўлган эди. Аввалроқ бу совринни икки марта франциялик Тиери Анри, португалиялик Криштиану Роналду, сербиялик Неманя Видич ва белгиялик Кевин Де Брюйне қўлга киритган.

Салоҳ АПЛ жорий мавсумида 28 та гол урди ва 18 та голли узатмани амалга оширди ва «Ливерпул» билан чемпион бўлди. Клуб чемпионат доирасида ҳали яна 1 ўйин ўтказади.

Салоҳ голлар ва голли узатмалар бўйича Премиер-лигада етакчилик қилмоқда. Унда энг яхши тўпурарга топшириладиган «Олтин бутса», шунингдек, «Олтин плеймейкер» совринини қўлга киритиш учун яхши имконият бор. Агар бу ҳолат юз берса, Салоҳ бир мавсумда 3 та шахсий совринни қўлга киритган биринчи футболчи бўлади.