Ўзбекистон президентининг тадбиркорлар билан мулоқоти лингвистик таҳлил қилинди

Таҳлил натижаларига кўра, Шавкат Мирзиёев ўз нутқида нафақат иқтисодий сиёсатнинг устувор йўналишларини белгилаб берди, балки мамлакат тараққиёти йўлида тадбиркорни давлатнинг асосий ҳамкори сифатида кўрсатиб, ижобий руҳ ва йўналишни ҳам шакллантиргани аниқланди.

Фото: Президент матбуот хизмати

Ўзбекистон президентининг тадбиркорлар билан мулоқоти Иқтисодий тадқиқотлар ва ислоҳотлар маркази (CERR) томонидан лингвистик таҳлил қилинди.

Тадбиркорлар куни муносабати билан 20 август куни Шавкат Мирзиёевнинг тадбиркорлар билан анъанавий очиқ мулоқоти бўлиб ўтди. Унда мамлакатнинг барча ҳудудларидан тадбиркор ва инвесторлар иштирок этди. Шунингдек, ҳудудий студияларда мингга яқин бизнес вакиллари ҳам қатнашди.

Лингвистик таҳлил натижалари президент тадбиркорликни қўллаб-қувватлаш, бизнес имкониятларини кенгайтириш, солиқ-молия тизимини такомиллаштириш ва янги иш ўринларини яратиш каби муҳим масалаларга алоҳида эътибор қаратганини аниқлади.

Нутқда тадбиркорлар мамлакатни модернизация қилишда асосий таянчга айланаётгани таъкидланди. Президент тадбиркорларни давлатнинг муҳим ҳамкори сифатида белгилаб, улар билан биргаликда ишонч, очиқлик ва олға ҳаракат руҳияти шакллантирилаётганини қайд этди.

Давлат раҳбари ўз нутқида жами 4241 сўздан фойдаланди. Энг кўп «тадбиркор» – 107 марта, «бизнес» – 34 марта, «корхона» – 29 марта, «солиқ» – 21 марта, «инвестиция», «лойиҳа», «кредит» – 15 марта, «тизим» – 14 марта, «шароит», «банк», «стартап» – 13 марта ва «экспорт» сўзи –12 марта тилга олинган (1-расм).

Бир қатор асосий ибораларга алоҳида эътибор қаратилди, «бизнес вакиллари» – 8 марта, «очиқ мулоқот» – 7 марта, «имтиёзли кредит» – 4 марта такрорланган. Шунингдек, нутқда «Янги Ўзбекистон», «кичик бизнес», «ёш тадбиркор», «якка тадбиркор», «молиявий хизматлар», «айланма маблағ» ва «энг илғор» каби иборалар ҳар бири 3 мартадан тилга олинган.

Уч сўздан иборат иборалардан «якка тартибдаги тадбиркор» ва «куч – бу тадбиркорлар» ибораларининг ҳар бири 3 марта қайд этилган. Шунингдек, нутқда «аҳоли ва тадбиркорлар», «лицензия ва рухсатнома», «боғча ва мактаб», «кичик бизнес учун», «имтиёзли кредит ажратилади», «қўллаб-қувватлашга тайёрман», «қарздорлик учун жарима», «банд қилган шахс» ва «оилавий меҳмон уйлари» ибораларининг ҳар бири 2 мартадан тилга олинган.

Таъкидланишича, бу сўзларнинг кўп такрорланиши нутқда асосий эътибор тадбиркорликни қўллаб-қувватлаш, инвестиция ва кредит механизмларини кенгайтириш, солиқ юкини енгиллаштириш ҳамда экспорт салоҳиятини оширишга қаратилганини кўрсатади.