Суд Трампга Миллий гвардияни Портлендга юборишни вақтинча тақиқлади

Орегон штати федерал судяси Карин Иммергут АҚШ президенти Доналд Трампга Миллий гвардия қўшинларини штатнинг энг зич жойлашган шаҳри Портлендга юборишни вақтинча тақиқлаб қўйди.

Қарорда, шунингдек, Портленддаги норозилик намойишлари қуролли кучларнинг киритилишини оқлаш учун «шу даражада зўравонлик ва бузғунчилик билан юз бермагани» қайд этилган. «Трампнинг Миллий гвардияни федераллаштириш ҳақидаги асослари штат губернаторининг рухсатисиз жойлаштиришни оқлаш учун талаб қилинадиган юқори стандартларга жавоб бермайди», — дея судя сўзлари келтирилган.

Бундан ташқари, Карин Иммергут Қўшма Штатлар «ҳукуматнинг ҳаддан ташқари таъсирига, хусусан, фуқаролик ишларига ҳарбий аралашув шаклида қаршилик кўрсатишнинг узоқ ва асосий анъаналарига эга» эканлигини таъкидлади. Трамп маъмурияти қарор устидан шикоят қилиши кутилмоқда. Орегон расмийлари, ўз навбатида, минтақада Миллий гвардияни жойлаштиришга қўйилган вақтинчалик тақиқни узайтиришни сўраш ниятида, деб хабар берди CNN.

28 сентябр куни Орегон ва Портленд расмийлари АҚШ ҳукуматини судга берди. Улар Доналд Трамп маъмурияти тартибсизликларга жавобан Орегон штати Миллий гвардияси қўшинларини федерал хизматга жалб қилишга буйруқ бериб, ўз ваколатларидан ошиб кетганини даъво қилмоқда.

Ҳужжатда президент, мудофаа вазири Питер Ҳегсет, ички хавфсизлик вазири Кристи Ноэм ва тегишли вазирликлар жавобгар сифатида кўрсатилган. Аввалроқ мудофаа вазири 200 нафар Орегон Миллий гвардияси аскари «дарҳол 60 кунлик муддатга федерал бурчга чақирилиши» айтилган меморандумни эълон қилди.