WSJ: Рубио АҚШ делегацияси раҳбари сифатида Уиткоффни алмаштиради

Будапештда бўлиб ўтадиган Путин-Трамп саммити олдидан Россия ва АҚШ Аляскадаги саммитдан кўра кўпроқ учрашувлар ўтказади, деб ёзади WSJ. Газетанинг ёзишича, бу гал АҚШ делегациясига давлат котиби Рубио бошчилик қилади.

Фото: AP

Қўшма Штатлар Россия билан Будапешт саммити олдидан икки давлат президентларининг август ойи ўрталарида Аляскада бўлиб ўтган биринчи учрашувидан кўпроқ учрашувлар ўтказишни режалаштирмоқда, деб хабар берди The Wall Street Journal (WSJ) 18 октябр, шанбага ўтар кечаси Оқ уйдаги манбаларга таяниб. Манбаларга кўра, АҚШ делегациясига АҚШ президенти махсус вакили Стив Уиткофф ўрнига давлат котиби Марко Рубио бошчилик қилади, бу ҳам Украина, ҳам Европа расмийлари томонидан олқишланган.

«Парда ортида [АҚШ президенти Доналд] Трампнинг жамоаси икки етакчи ўртасидаги музокараларни у Россия президенти Владимир Путин билан августдаги саммитида қўллаганидан кўра кучлироқ дипломатик таъсирлар билан мустаҳкамлаш устида ишламоқда», деб ёзади WSJ. Журналистларнинг фикрича, Трампнинг Путин билан навбатдаги саммитни ташкил этиш ҳақидаги қарори «хавфсиз эмас», чунки Оқ уй ва Кремл раҳбарларининг аввалги учрашуви катта муваффақиятларсиз якунланган ва «асосан Москванинг ғалабаси сифатида кўрилган».

16 октябр оқшомида, Украина президенти Володимир Зеленскийнинг АҚШга ташрифидан бир кун олдин Трамп Путин билан икки соатлик телефон мулоқоти ўтказди. Суҳбатдан сўнг у Будапештда Россия президенти билан учрашишга келишиб олганини маълум қилди. Уларнинг саммити Америка ва Россия делегацияларининг учрашувида тайёрланиши режалаштирилган.

The Wall Street Journal нашрининг ёзишича, Оқ уй Трампга Россияга қарши санкциялар қўллаш бўйича кенгроқ ваколатлар берувчи қонун лойиҳасини илгари суриш учун «АҚШ Вакиллар палатаси аъзолари билан яқиндан ишламоқда». WSJ манбаларидан бири аниқлик киритишича, санкциялар тўғрисидаги қонун лойиҳаси кейинги 30 кун ичида овозга қўйилиши мумкин. Доналд Трампнинг ўзи Оқ уйда Зеленский билан учрашуви чоғида Путин билан саммитга тайёргарлик АҚШнинг Россияга қарши санкцияларини жорий қилиш учун «яхши вақт» эмаслигини таъкидлади.

«Россия биринчи марта статус-квонинг айрим ҳудудий чегараларини сақлаб қолишга тайёрлигини маълум қилди ва 2024 йил июн ойида Украинанинг тўртта шарқий минтақаси (Луханск, Донецк, Херсон ва Запорижжя) устидан тўлиқ назорат ўрнатиш тўғрисидаги ўз талабларининг бир қисмидан воз кечди», дейилади WSJ материалида.