Месси яширинча «Барселона» стадионига борди

Аргентина миллий жамоаси ва «Интер Майами» (АҚШ) клуби юлдузи Лионел Месси собиқ жамоаси «Барселона»нинг янгиланган аренасида бўлди.

38 ёшли жаҳон чемпиони «Камп Ноу» стадионидан тунда, бўш трибуналар олдида олинган бир қатор суратларни эълон қилди. Сафар журналистлар ва мухлислардан сир тутилган.

- Кеча бутун вужудим билан соғинган жойимга қайтдим. Мен ниҳоятда бахтиёр бўлган жой, йигитлар сиз мени дунёдаги энг бахтли одам деб ҳис қилишга мажбур қилган жой. Умид қиламанки, бир кун келиб қайтаман ва нафақат футболчи сифатида ўзим билан хайрлашиш учун...», деб ёзди футболчи ижтимоий тармоқдаги саҳифасида.

 

 

 

 

View this post on Instagram

 

 

 

 

 

 

 

 

 

 

 

A post shared by Leo Messi (@leomessi)

Шу билан бирга, испаниялик журналистларнинг таъкидлашича, Месси бу ҳақда ҳатто клубни ҳам олдиндан огоҳлантирмаган ва хавфсизлик хизмати ходимлари билан кейинроқ келишиб олган.

Лео Месси кеча Spotify Camp Nou’да пайдо бўлган ва хавфсизлик хизмати ходимларидан объектга кириш учун рухсат сўраган. У олдиндан огоҳлантирмаган, бу ишни шу жойда амалга оширган ва рухсат олган, деб ёзди журналист Херард Ромеро.

Эслатиб ўтамиз, Месси 2003-2021 йилларда каталонияликлар шарафини ҳимоя қилган ва клубнинг тирик афсонасига айланган. У 10 марта Испания чемпионлигини, 4 марта Чемпионлар Лигасидаги ғолибликни қўлга киритган.

Аргентиналик футболчи клуб тарихидаги энг яхши тўпурар ҳисобланади - 672 та гол, 2011/2012-йилги мавсумда эса Испания чемпионатида 50 та гол уришга муваффақ бўлган (Лига рекорди).

2021 йилда Месси «Барселона»ни тарк этиб, «Пари Сен-Жермен» клубига ўтди.