Колумбия президенти Трампнинг таҳдидидан кейин халқдан ёрдам сўради

Колумбия президенти Густаво Петро аввалроқ Лотин Америкаси давлатлари раҳбарларига қарши куч ишлатиш эҳтимолини айтган АҚШ президенти Доналд Трампнинг сўзлари фонида кескин баёнот берди.

Трамп Петрони «эҳтиёткор бўлиши кераклиги» ҳақида тўғридан-тўғри огоҳлантирган эди.

Колумбия президенти ўз баёнотида бундай сигналларни мамлакат суверенитетига ва шахсан ўзига таҳдид деб ҳисоблашини таъкидлади.

- Агар халқимнинг катта қисми ҳурмат қиладиган ва қўллаб-қувватлайдиган президент қўлга олинса, сиз «халқ ягуари»ни уйғотасиз, деди Петро.

- Агар сиз етарлича разведка қилмасдан зарба берсангиз, кўплаб болаларни ўлдирасиз. Деҳқонларни бомбардимон қилсангиз, тоғларда минглаб янги партизанлар пайдо бўлади. Колумбиянинг ҳар бир аскари бундан буён буйруққа эга: жамоат хавфсизлиги кучларининг ҳар қандай қўмондони АҚШ байроғини Колумбия байроғидан афзал кўрса, дарҳол хизматдан четлатилади. Мен 1989 йилги тинчлик пактидан кейин ҳеч қачон қўлимга қурол олмасликка қасам ичганман, лекин Ватаним учун яна қурол оламан, гарчи хоҳламасам ҳам. Мен ноқонуний ёки гиёҳванд моддалар сотувчиси эмасман. Менинг бор-йўқ мулким оилавий уй бўлиб, уни маошимдан тўлайман. Мен халқимга жуда ишонаман. Мен халқдан президентни ҳар қандай ноқонуний зўравонлик ҳаракатларидан ҳимоя қилишни сўрадим. Хавфсизлик кучларига буйруқ - халққа эмас, босқинчига қарата ўқ узиш, деб қўшимча қилди Колумбия президенти.

Эслатиб ўтамиз, АҚШ президенти Доналд Трамп Венесуэла президенти Николас Мадуро қўлга олинганидан кейин Густаво Петрони очиқчасига огоҳлантириб, Колумбияда кокаин ишлаб чиқарилаётгани ва у АҚШ ҳудудига кириб келаётганини айтганди.

«Колумбия ҳам жуда касал. Уни кокаин ишлаб чиқариш ва уни Қўшма Штатларга сотишдан завқланадиган одам бошқаряпти. Лекин мен сизга айтаман: у бу билан узоқ шуғулланмайди», деди Трамп.

У, шунингдек, Мексика ҳақида ҳам худди шундай оҳангда гапирди, унинг сўзларига кўра, бу давлат «наркокартеллар ҳукмронлиги остида ва у билан нимадир қилиш керак».