Politico: АҚШ Украинага кафолатлар ҳақидаги декларацияни имзоламади

Politico нашри ёзишича, АҚШ вакиллари 6 январ куни Парижда бўлиб ўтган учрашувда Украина учун хавфсизлик кафолатлари ҳақидаги декларацияни имзолашдан бош тортган. Нашр ўз ихтиёрида бўлган баёнотнинг дастлабки лойиҳасига таяниб, Париждаги учрашув иштирокчиларининг якуний қўшма баёнотидан Вашингтоннинг Киевни қўллаб-қувватлаш бўйича аниқ ва бир маъноли ваъдаси чиқариб ташланганини 6 январ, сешанба куни кечқурун ёзди.

Politico қайд этишича, имзоланган ҳужжатда АҚШнинг Украинадаги кўпмиллатли контингентда иштирок этиши ва Россия томонидан яна ҳарбий тажовуз бўлса, бу кучларни разведка ҳамда логистика имкониятлари билан қўллаб-қувватлаш мажбуриятлари ҳақидаги бандлар йўқ. Ҳужжатда фақат “АҚШнинг таклиф этилаётган қўллаб-қувватлаши” деган ибора бор, лекин ҳеч қандай тафсилот берилмаган, деб ёзади нашр. Шунингдек, “кўнгиллилар коалицияси”нинг Украина билан узоқ муддатли ҳарбий ҳамкорлиги ҳақидаги бандда ҳам АҚШ тилга олинмаган.

Шу орада АҚШ президенти Доналд Трампнинг куёви Жаред Кушнер Париждаги учрашувдан кейин Украинага Россия янги тажовузини олдини олиш бўйича реал механизмларга эга “қудратли” хавфсизлик кафолатларини ваъда қилди — “агар Украина тинчлик ҳақида якуний келишувни тузса”.

Махсус вакил Стивен Уиткофф билан бирга Парижга келган Кушнер, “тўғри келишув” тузилса, РФ президенти Владимир Путин урушни қайта бошламаслигига ишонч билдирди. Унинг айтишича, Трамп Путин билан суҳбатларига таяниб шундай хулосага келган.

Париждаги учрашувда “кўнгиллилар коалицияси”га кирувчи давлатлар Украина учун хавфсизлик кафолатлари ҳақида декларацияни имзолади. Франция президенти Эммануэл Макрон шундай деди: “Бугун биз сезиларли илгарилашга эришдик, бу Париж декларациясида акс этган — у барқарор тинчлик учун ишончли кафолатларни тақдим этади. Ушбу ‘кўнгиллилар коалицияси’ баёнотида илк бор бирлашмага кирувчи 35 давлат, шунингдек Украина ва АҚШ ўртасида тезкор яқинлашув тан олинади. Биз ишончли хавфсизлик кафолатлари ҳақида гапиряпмиз”.

Макрон келишилган бандларни алоҳида санаб ўтди. Улар орасида — АҚШ раҳбарлигида ўт очишни тўхтатишни мониторинг қилиш, Украинани мудофаа учун узоқ муддатли қурол-яроғ билан таъминлаш, шунингдек келажакда Россия томонидан қайта ҳужум бўлса, мамлакатни қўллаб-қувватлаш бўйича мажбурий кучга эга келишувларни қабул қилиш устида ишлаш бор.

Бундан ташқари, Киев, Париж ва Лондон ниятлар декларациясини ҳам имзолади. Буюк Британия бош вазири Кир Стармернинг сўзларига кўра, бу ҳужжат ўт очиш тўхтатилгандан кейин Украинада британ, француз ва бошқа “шерик” қўшинларни жойлаштириш учун “ҳуқуқий асос” яратади. “Бу Украинага узоқ муддатда кўмак бериш бўйича қатъий мажбуриятимизнинг энг муҳим қисми”, — дея Стармер сўзларини келтирган унинг офиси. Стармер, шунингдек, ўт очиш тўхтатиш режими бошланиши билан Буюк Британия ва Франция бутун Украина бўйлаб “ҳарбий марказлар” ташкил этишини ҳамда “қурол ва ҳарбий техника сақлаш учун ҳимояланган объектлар қуриши”ни айтди.