Венесуэла АҚШ кўрсатмаларига бўйсунишдан чарчади – Делси Родригес

CNN хабарига кўра, у Пуэрто-ла-Крус шаҳрида нефтчилар олдида нутқ сўзлаб, Венесуэла сиёсатчиларини ички келишмовчиликларни чет элдан келган буйруқларга бўйсунмасдан, ўзаро ҳал қилишга чақирди. Родригеснинг таъкидлашича, Венесуэла «мамлакатдаги фашизм ва экстремизмга қарши курашда» жуда юқори нарх тўлаган.

Қайд этилишича, январ ойи бошида президент Николас Мадуро АҚШ махсус кучлари томонидан қўлга олинганидан сўнг, Родригес Оқ уй талаблари ва мамлакат аҳолиси қўллаб-қувватловини сақлаб қолиш зарурати ўртасида мувозанатни сақлаб келмоқда. Вашингтон Каракасга бир қатор талабларни қўйган: мамлакат Хитой, Россия, Эрон ва Куба билан иқтисодий алоқаларни узиши, шунингдек, нефт қазиб олиш соҳасида АҚШ билан эксклюзив ҳамкорликка рози бўлиши ва оғир нефтни сотишда Америка компанияларига устунлик бериши керак.

Аввалроқ Родригес АҚШ Венесуэлани бошқармаётганини таъкидлаган, бироқ шу билан бирга Вашингтоннинг баъзи талабларини бажара бошлаган эди. АҚШ президенти Доналд Трамп Мадурони қўлга киритгач, Америка Венесуэлани «хавфсиз» ўтиш даври бошлангунча «бошқаришини» ва мамлакатнинг улкан нефт захираларини ўз назоратига олишини айтди.

Мамлакат Мадуро тарафдорлари, сўл мухолифат ва «чавист-мадурист» - марҳум Уго Чавеснинг издошлари ўртасида бўлинган. CNN нашрига кўра, Мадуро даврида вице-президент бўлган Родригес энди бу гуруҳларни бирлаштиришга ва бир вақтнинг ўзида янги санкциялар ёки ҳарбий ҳаракатлардан қочиш учун Вашингтон билан муносабатларда мувозанатни топишга ҳаракат қилмоқда.

Венесуэла ҳукумати 25 январ куни сиёсий сабабларга кўра қамалган 104 кишини қамоқдан озод қилди. Бу 8 январдан бери давом этмоқда. АҚШ президенти Доналд Трамп сиёсий маҳбуслар Америка маъмурияти талаби билан қўйиб юборилаётганини айтди.