“Интерфакс”: Россиядан нақд рубл ва олтин олиб чиқишга чеклов қўйилади

Жисмоний шахсларга Россиядан ЕОИИ давлатларига нақд рублни 10 минг долларга тенг ёки ундан ортиқ эквивалентда олиб чиқиш тақиқланади. Бу ҳақда душанба, 2 феврал куни “Интерфакс” агентлиги ҳужжат лойиҳасига таяниб хабар қилди.

Агентлик маълумотларига кўра, истиснолар РФ халқаро аэропортлари орқали маблағ олиб чиқилганда қўлланади. Бунда божхона органларини мажбурий хабардор қилиш, шунингдек пулнинг келиб чиқиш манбаи ва у нима мақсадда ишлатилиши ҳақида маълумот тақдим этиш шарт бўлади. Агар 100 минг доллар (84 600 евро) чегарасидан ҳам ошса, пул келиб чиқишини тасдиқловчи ҳужжатлар ҳам талаб қилинади.

Юридик шахслар ва якка тартибдаги тадбиркорлар учун декларациясиз (эълон қилмасдан) олиб чиқиш бўйича “минимум” бўлмайди: улар исталган сумма олиб чиқиши мумкин, аммо фақат халқаро аэропортлар орқали ва божхонага хабар берган ҳолда.

Кредит ташкилотларига мазкур чекловлар қўлланмайди.

Бундан ташқари, жисмоний шахсларга Россиядан умумий оғирлиги 100 граммдан ортиқ бўлган олтин қуймаларни олиб чиқиш ҳам тақиқланади. Истиснолар фақат Шереметево, Домодедово, Внуково ва Владивостокдаги Кневичи аэропорти орқали учиб кетувчилар учун қўлланади, бунда РФ Федерал проба палатаси рухсати бўлган тақдирда.

Чекловларни 1 сентябрдан РФ президенти Владимир Путин фармони билан жорий этиш режалаштирилган. РФ Молия вазирлиги лойиҳани изоҳламаган.

2022 йил март ойидан бери Россияда нақд хорижий валюта ва хорижий валютадаги пул инструментларини 10 минг доллардан (8460 евро) ортиқ суммада олиб чиқиш тақиқланган.

ЕОИИ таркибига Арманистон, Беларус, Қозоғистон ва Қирғизистон киради.