АҚШ Эронга қарши Украинада синовдан ўтган 10 мингта дронни қўллайди

АҚШ Украинадаги уруш давомида жанг шароитида синовдан ўтган 10 мингта тўсиб қолувчи учувчисиз аппаратни Яқин Шарққа юборган. Бу ҳақда қуруқлик қўшинлари вазири Дэниел Дрисколл 13 март, жума куни Bloomberg агентлигига берган интервюсида маълум қилди. Унинг айтишича, бу дронлар Эрон ҳужумларини қайтариш учун қўлланади.

Гап сунъий интеллект билан жиҳозланган Merops дронлари ҳақида кетмоқда. Улар Google’нинг собиқ раҳбари Эрик Шмидтга тегишли Калифорниядаги мудофаа корхонаси Project Eagle томонидан ишлаб чиқилган. 2024 йил ёзида Украина армияси бу дронларни биринчи бўлиб қабул қилиб олган эди.

Дрисколлнинг сўзларига кўра, АҚШ ва Исроил 28 феврал куни эрталаб Эронга қарши урушни бошлаганидан сўнг, Merops дронлари беш кун ичида Яқин Шарққа юборилган. У бир дона бундай дроннинг қиймати тахминан 14–15 минг доллар эканини, йирик буюртмаларда эса нарх 3–5 минг долларгача тушишини айтди. Таққослаш учун, Bloomberg таъкидлашича, Эроннинг Shahed дронлари камида биттаси 20 минг доллар туради.

Шунингдек, АҚШ армияси Яқин Шарқда душман дронларига ҳужум қилиш учун мўлжалланган, портловчи моддалар билан жиҳозланган Bumblebee квадрокоптерларидан ҳам фойдаланмоқда. Улар ҳам, Merops каби, Шмидт билан боғлиқ Perennial Autonomy компанияси томонидан ишлаб чиқилган бўлиб, Украина армияси томонидан аллақачон қўлланган.

13 март куни АҚШ президенти Дональд Трамп Fox News радиостанцияси эфирида бошловчи Брайан Килмид билан суҳбатда унинг мамлакатига дронлардан ҳимояланиш бўйича Украина ёрдами керак эмаслигини айтди. Америка етакчиси шундай деди: “Биз дронлар ҳақида бошқаларга қараганда кўпроқ биламиз. Аслида, дунёдаги энг яхши дронлар бизда”.

Шу билан бирга, 9 март куни Украина президенти Володимир Зеленский The New York Times газетасига берган интервюсида, унинг мамлакати Иорданиядаги Америка ҳарбий базаларини ҳимоя қилиш учун тўсиб қолувчи дронлар бўйича экспертлар гуруҳини юборганини айтган эди. Зеленскийнинг сўзларига кўра, Вашингтон бундай ёрдам билан Киевга 5 март куни мурожаат қилган ва украин жамоаси эртаси куниёқ йўлга чиққан.

10 март куни эса Bloomberg агентлиги манбага таяниб, АҚШ Украинага тегишли антидрон тизимларини, жумладан Япония, Жанубий Корея, Европа ва Яқин Шарқдаги базаларга жойлаштириш режасини кўриб чиққанини хабар қилди. Бироқ “муҳокамалар кенг кўламли ҳамкорликка айланмади”.