Россияда Telegram амалда ишламай қолди

Россияда ҳатто VPN қўлланганда ҳам Telegram мессенжерининг барча версиялари ишида кенг кўламли муаммолар кузатилаётгани хабар қилинмоқда. Россиялик журналистлар фикрича, ҳокимият Telegram’ни тўлиқ блоклашни бошлаган бўлиши мумкин.

Фото: Д. Умбрасаса / LRT

Россияда Telegram ишида кенг кўламли узилишлар ҳақида хабар берилмоқда. Россия ОАВ 16 март, душанба куни РФнинг турли ҳудудлари, жумладан Москва ва Санкт-Петербургдан келган фойдаланувчилар шикоятларига таяниб ёзишича, мессенжер деярли ишламай қолган — ҳатто VPN ишлатилганда ҳам унинг мобил, десктоп ва веб версиялари турли кўринишларда тўғри ишламаяпти.

«Коммерсант» нашри суҳбатлашган экспертларга таяниб қайд этишича, Россияда сўнгги ҳафталарда огоҳлантирилган Telegram блокировкаси аллақачон бошланган.

«Сўнгги бир суткада Telegram уй провайдерлари орқали, агар Россия IP-манзиллари орқали уланиш ҳақида гапираётган бўлсак, амалда ишламаяпти. Telegram’нинг мобил интернет орқали ишлаши ҳақида унутиш мумкин. Агар қайсидир шаҳарда фақат “оқ рўйхат”даги сайтлар фаол бўлса, у ҳолда кўпчилик VPN-сервислар ҳам Telegram’га киришга ёрдам бермайди», — деди «Коммерсант»га «Код Дурова» интернет нашри эксперти Владислав Войтенко.

Алоқа операторлари ассоциацияси МАКАТЕЛ президенти Алексей Амелкин ҳам Telegram билан боғлиқ муаммоларни тасдиқлади.

«Секинлаштириш анчадан бери бор эди, лекин кеча Telegram’нинг Desktop-версияси ишламай қолгани ҳақида шикоятлар пайдо бўлди. Ҳозирча операторлар бўйича статистика кам ва аниқ эмас, чунки одамлар VPN ишлатяпти, шунинг учун мессенжер ишлаяптими ёки йўқми, аниқ айтиш қийин. Тестлар шуни кўрсатмоқдаки, эҳтимол, ҳаммаси алоқа тармоғига — уяли ёки стационар тармоққа — шунингдек ҳудудга ва ҳатто жойнинг ўзига боғлиқ. Давлат органлари турли ҳудудларда турлича шартларни қўллаяпти, эҳтимол, бу синов учун бўлиши мумкин. Шунинг учун ягона ҳолат йўқ», — деди у.

Ўтган дам олиш кунлари Downdetector ва сбой.рф сайтларида Telegram’нинг турли версиялари иши бўйича турли ҳудудлардан келган шикоятлар сони яна ошди. Шикоятларнинг катта қисми Москва, Санкт-Петербург ва Москва вилоятидан тушган.

Шу билан бирга, Москва Таганский туман суди 16 март куни Россияда тақиқланган деб эълон қилинган контентни ўчиришдан бош тортгани учун Telegram’ни 35 миллион рубл жаримага тортди. ТАСС ахборот агентлиги хабар беришича, гап «экстремизм»га чақириқлар, вояга етмаганлар иштирокидаги порнографик материаллар, шунингдек гиёҳванд моддаларни тайёрлаш ва харид қилиш усуллари ҳақидаги ахборот ҳақида бормоқда.