Эрон вақтинчалик ўт очишни тўхтатиш таклифини рад этди

Эрон Теҳрон ва Вашингтон ўртасида воситачилик қилаётган Покистонга сулҳ таклифига ўз жавобини юборди, деб хабар берди маҳаллий IRNA агентлиги.

Эроннинг топширилган режаси ўнта банддан иборат. Унда Теҳрон вақтинчалик сулҳ тузиш таклифини рад этиб, бунинг ўрнига урушни узил-кесил тўхтатишга эришиш зарурлигини билдирган.

Шунингдек, Эрон санкцияларни бекор қилишни ва кемаларнинг Ҳўрмуз бўғозидан хавфсиз ўтиши учун протокол яратишни талаб қилмоқда.

Reuters агентлиги аввалроқ, 6 апрель куни Покистон АҚШ ва Эронга ўз тинчлик режаси вариантини бергани ҳақида ёзган эди. Унда зудлик билан ўт очишни тўхтатиш ва кенгроқ тинчлик битимини муҳокама қилиш учун 15-20 кунлик фаол музокараларни бошлаш кўзда тутилган.

Axios АҚШ ва Эрон минтақавий воситачилар иштирокида 45 кунлик ўт очишни тўхтатиш шартларини ҳам муҳокама қилаётгани ҳақида ёзган эди. Нашр буни «жиддий кескинлашувдан қочишнинг сўнгги уриниши» деб атади - унинг маълумотларига кўра, АҚШ ва Исроил аллақачон Эрон энергетикасига оммавий зарбалар бериш режасини тайёрлаб қўйган.

АҚШ президенти Доналд Трамп агар Теҳрон яқин орада Ҳўрмуз бўғози орқали кема қатновини йўлга қўймаса, Эрон бошига «жаҳаннам» ёғилишини ваъда қилди. Трампнинг муддати 8 апрелга ўтар кечаси тугайди.