Покистонда теракт оқибатида 20 дан ортиқ киши ҳалок бўлди

Покистон жануби-ғарбидаги Белужистон вилоятида худкуш террорчи томонидан амалга оширилган портлаш оқибатида 23 киши ҳалок бўлиб, камида 70 киши яраланди.

Бу вақтда ҳарбий хизматчиларни олиб кетаётган поезд ҳудуд маъмурий маркази ҳисобланган Кветта шаҳри орқали ўтаётганди.

Поезднинг икки вагони ағдарилиб, ёниб кетган, яқин атрофда турган автомобиллар, бир нечта уйлар ва темирйўл линияси яқинида жойлашган бинолар шикастланган.

AFP агентлиги маҳаллий расмийларга таяниб хабар беришича, вагонлардан бирига «портловчи моддалар ўрнатилган автомобил» келиб урилган ва бу «кучли портлаш» келтириб чиқарган.

Мавжуд маълумотларга кўра, ўз мустақил давлатини қуриш учун курашиб келувчи «Белужистон озодлик армияси» ушбу ҳужум учун жавобгарликни ўз зиммасига олган.

Покистон бош вазири Шаҳбоз Шариф «қўрқоқларча содир этилган террорчилик акти»ни кескин қоралади ва бу ҳужум Покистон халқининг қатъиятига дахл қила олмаслигини таъкидлади.

«Ҳалок бўлганларнинг оила аъзоларига чуқур ҳамдардлик билдираман ва яраланганларнинг тезроқ соғайиб кетишини тилайман», – дея қўшимча қилган у.

Покистон сенати аъзоси ва мамлакатнинг АҚШдаги собиқ элчиси Шерри Раҳмон ҳам ҳужумни қоралаб, қурбонларнинг кўпчилиги Қурбон ҳайитини нишонлаш учун кетаётган аёллар ва болалар бўлганини айтган.

«Бундай ёвузликларни содир этаётганлар шуни билишлари керакки, фуқароларимиз ва хавфсизлик кучлари пўлат асосга эга», – деган у.