Ўзбекистон сўнгги дақиқаларда гол ўтказиб, Нидерландияга мағлуб бўлди

Ўзбекистон миллий жамоаси халқаро ўртоқлик учрашувида Нидерландияга қарши майдонга тушиб, 1:2 ҳисобида мағлуб бўлди. 

32-дақиқада ҳакам мезбонлар фойдасига пеналти белгилади ва Коди Гакпо имкониятдан унумли фойдаланиб, ҳисобни очди.

87-дақиқада эса Гус Тил қизил карточка олиб, майдонни тарк этди ва нидерландияликлар ўйиннинг сўнгги дақиқаларини бир киши кам бўлиб ўтказишга мажбур бўлди.

Сон жиҳатдан устунликка эга бўлган Ўзбекистон босимни кучайтирди ва бунинг натижасида 90+2-дақиқада Игор Сергеев ҳисобни тенглаштирди.

Ўйинга қўшиб берилган сўнгги дақиқаларда Нидерландия яна бир пеналти ишлаб олди. Тўп олдига келган Коди Гакпо иккинчи бор аниқ зарба бериб, Нидерландияга ғалаба келтирди. 

Бундан олдин Фабио Каннаваро шогирдлари Канада миллий жамоасига қарши ўртоқлик ўйини ўтказиб, 2:0 ҳисобида мағлуб бўлган эди. 

Нидерландия – Ўзбекистон 2:1
Голлар: Гакпо 32 (пен.), 90+8 (пен.) – Сергеев 90+2.
Четлатиш: Тил 87 (Нидерландия).