Ўзбекистон ва Сенегал вакиллари АҚШда қаттиқ текширувдан ўтказилди

АҚШ ҳукумати ва ФИФА расмийлари ЖЧ-2026 арафасида футбол бўйича Ўзбекистон ва Сенегал миллий жамоаларига кўрсатилган муносабат туфайли танқидга учрамоқда: икки жамоа вакиллари ҳам металл детекторлар ва исковуч итлар ёрдамида қаттиқ текширувдан ўтказилган.

Ижтимоий тармоқларда тарқалган видеоларга кўра, Ўзбекистон вакилларини Ню Йоркда, Нидерландияга қарши ўртоқлик учрашувига етиб келишгани текширишга қарор қилишган. Видеода жамоа автобусидан тушиб келаётган Фабио Каннаваро бошчилигидаги мураббийлар штаби вакилларидан смартфонларини бериш ва чўнтакларини очиб кўрсатиш сўралгани акс этган.

Шунингдек, жамоа вакилларининг сумкалари ерга тўпланган ва исковуч ит ёрдамида текширилган.

Шундан кейингина жамоага стадионга киришга рухсат берилган.

Ўз навбатида, Нидерландия футболчилари бундай текширувдан ўтказилмаган.

Африкаликлар жамоаси билан боғлиқ вазият эса ундан ҳам ўтиб тушди – Техас штати Сан-Антонио шаҳридаги аэропортга қўнган футболчилар самолётдан тушиши биланоқ текширилган.

Видеода футболчилар ва делегациянинг бошқа вакиллари тўғридан тўғри текширув майдонида синчиклаб текширувдан ўтказилаётганини кўриш мумкин: хавфсизлик хизмати ходимлари меҳмонларни қўл металл детектор билан текширишган, кейин эса улар оёқ кийимларни ечиш ҳамда сумкаларни очиб кўрсатишга мажбурланган.

Кўплаб мухлислар бундай чораларни ҳақоратомуз деб баҳоламоқда.

Ижтимоий тармоқ фойдаланувчилари бундай текширувлар Европа ёки бошқа қитъалардаги олдинги жаҳон чемпионатларида кузатилмаганини қайд этишмоқда. Шунингдек, Африка ва Осиё вакилларига айрича муносабатда бўлинаётгани ҳақида айбловлар янграмоқда.

«Бу делегацияларнинг барчаси ортига қайтиши ва ФИФА жаҳон чемпионатини якка ўзи ўтказишига қўйиб бериши керак. Бу ўта қўпол ҳурматсизлик», – дейди AkumaCelest никли фойдаланувчи.

«ФИФА уялиши керак. Бу осиёликлар, жанубий америкаликлар ва африкаликлар билан содир бўлади. Ҳеч бир европалик мулозим ёки спортчи бундай камситилишга дучор бўлмайди», – дея унинг фикрига қўшилади dimotc.

«Уларга жиноятчилардек муомала қилишди. Эрон жамоаси билан янада ёмонроқ бўлади», – дея қайд этган KvThgio.

Бу биринчи можаро эмас

Шу кунларда сомалилик арбитр Умар Артанни АҚШга киритишмагани маълум бўлганди. У Африканинг 2025 йилдаги энг яхши ҳаками сифатида эътироф этилгани ва дипломатик паспортга эгалигига қарамай, ҳеч қандай изоҳсиз унга рад жавоби берилган ва Истанбулга қайтариб юборилган.

Артан Сомалининг жаҳон чемпионати ўйинларига тайинланадиган илк вакили бўлиши керак эди. ФИФА бу вазиятда ҳеч қандай чора кўра олмади.

«ФИФА қабул қилувчи мамлакатнинг иммиграция жараёнларида, жумладан, виза бериш тўғрисидаги қарорларда иштирок этмайди ва расмийлар бизга жаноб Артаннинг мақоми ҳозирда ўзгармаслигини маълум қилишди», – деган федерация вакили Sky Sports телеканалига берган изоҳида.

Арбитрнинг ўзи юзага келган вазиятга қарамай, ижобий кайфиятни сақлаб қолган.

«Футбол оиласига қўллаб-қувватлаганлари учун миннатдорчилик билдираман, ҳамкасбларимга жаҳон чемпионатида муваффақиятлар тилайман. Келгусидаги турнирларда уларга яна қўшилишга умид қиламан», – дея унинг сўзларини келтиради Reuters.

Бошқа шов-шувли ҳолатлар ҳам бўлди. Хусусан, Ироқ миллий жамоаси ҳужумчиси Айман Ҳусайнни ҳам узоқ текширишди: Чикаго аэропортидаги чегарачилар уни қарийб етти соат давомида сўроқ қилишган ва шундан кейингина мамлакатга киришга рухсат беришган. Ироқликлар жамоаси фотосуратчиси Талал Салоҳнинг эса омади келмади – уни ортга қайтариб юборишган.

2026 йилги жаҳон чемпионати 11 июн куни бошланади. Очилиш ўйини Мексика ва ЖАР миллий жамоалари иштирокида бўлиб ўтади.