AQSh Shinjon-Uyg‘ur muxtor tumanida musulmon uyg‘urlarga nisbatan ro‘y berayotgan bosim tufayli Xitoyga qarshi sanksiyalar qo‘llash imkoniyatini ko‘rib chiqmoqda. Bu haqda davlat kotibi Mayk Pompeoning yordamchisi ma'lum qildi, deya xabar beradi Reuters.
Uning so‘zlariga ko‘ra, Vashington Shinjon-Uyg‘ur muxtor tumanidagi vaziyatni kuzatib bormoqda va tegishli choralar ko‘rishga tayyor turibdi.
Oq uyda bir necha oydan beri sanksiyalar muhokama qilinmoqda. Shu bilan birga, AQSh prezidenti Donald Tramp ma'muriyati Shinjon-Uyg‘ur muxtor tumanidagi etnik ozchilik muammosiga yetarlicha e'tibor bermaganligi qayd etiladi.
Eslatib o‘tamiz, avvalroq Xitoyda uyg‘urlar uchun «qayta tarbiyalash lagerlari» borligi ma'lum qilingandi.
The New York Times gazetasi Xitoyning Shinjon-Uyg‘ur muxtor tumanida millionga yaqin etnik uyg‘urlar musulmonlar uchun «qayta tarbiyalash lagerlarida» qolayotgan bo‘lishlari mumkinligi haqida yozgan. Xabar qilinishicha, Xitoy hukumati ularni Xitoy tili, qonunlarini o‘rganish va ish ko‘nikmalariga ega bo‘lishga majburlamoqda; ushbu lagerlarda bo‘lishning asosiy maqsadi «odamlarning o‘zgarishi», deb atalgan.
Bundan avval esa Xitoy xorijda yashovchi uyg‘urlarni qo‘rqitayotgani haqida xabarlar paydo bo‘ldi.
Qayd etilishicha, Xitoy boshqa davlatlarda, shu jumladan, Amerika Qo‘shma Shtatlarida yashaydigan musulmonlar fuqarolarini doimo kuzatib bormoqda.
