Samarqand viloyatining Pastdarg‘om, Oqdaryo, Jomboy, Payariq va Narpay tumanlari davlat soliq inspeksiyalariga yangi rahbarlar tayinlangan. Bu haqda viloyat hokimligi matbuot xizmati xabar bergan.
Shu paytgacha Payariq tumani davlat soliq inspeksiyasi bo‘lim boshlig‘i vazifasida faoliyat ko‘rsatgan Asatulla Ahmedov Pastdarg‘om tumani davlat soliq inspeksiyasi boshlig‘i lavozimiga tayinlandi.
Oqdaryo tumani davlat soliq inspeksiyasi boshlig‘i o‘rinbosari bo‘lgan G‘olibjon Hamroyev shu tuman davlat soliq inspeksiyasiga rahbar etib tayinlandi.
Oqdaryo tumani soliq inspeksiyasi sobiq boshlig‘i G‘ayrat Burhonov esa Jomboy tumani davlat soliq inspeksiyasiga boshlig‘i lavozimiga tayinlandi.
Payariq tumani davlat soliq inspeksiyasiga shu paytgacha mazkur tumanda inspeksiya boshlig‘ining birinchi o‘rinbosari bo‘lgan Sherzod Turopov boshliq bo‘ldi.
Samarqand shahar davlat soliq inspeksiyasida faoliyat olib borgan Muhiddin Nazarov Narpay tumani davlat soliq inspeksiyasiga boshliq etib tayinlandi.
Bundan oldinroq Farg‘ona viloyati soliq idoralarida katta o‘zgarishlar yuz bergandi: Shukrulloxon Nisbatxonov viloyat Davlat soliq boshqarmasi boshlig‘i o‘rinbosari etib tayinlandi, Bahodir Xoliqov — Farg‘ona shahriga, Nazarjon Polvonov — Quvasoy shahriga, Qobuljon Abdullayev — Furqat tumaniga, Avazbek Oxunov — Yozyovon tumaniga bosh soliqchi bo‘ldi.
Ma'lumot uchun, shu oy boshidan buyon Qoraqalpog‘iston Respublikasida, Toshkent viloyatida, Surxondaryo va Qashqadaryo viloyatlarida davlat soliq boshqarmasi boshliqlari o‘zgargandi.
