15 aprel kuni O‘zbekiston milliy matbuot markazida bo‘lib o‘tgan matbuot anjumanida Davlat test markazi mutaxassislari 2019 – 2020 o‘quv yili uchun kirish imtihonlarida test varaqalariga kiritiladigan asosiy o‘zgarish va qo‘shimchalar to‘g‘risida ma'lumot berdi.
Ma'lumot berilishicha, joriy yilda test topshiriqlari bazasini shakllantirishda quyidagi yangiliklar:
- Grafik, yozuvsiz xarita, rasmlar (masalan, geografik nuqtalar, diagramma, grafiklardagi ko‘rsatkichlar yoki rasmlar test savollari varaqasida aks etadi);
- Adabiyot fanidan ta'lim muassasalari o‘quv dasturiga kiritilgan badiiy asarlardan ayrimlarini to‘liq o‘qish tavsiya etiladi;
- O‘lchov birliklarining yangicha ifodalanishi qo‘llaniladi.
Tavsiya etilgan badiiy adabiyotlar ro‘yxati quyidagi asarlardan iborat:
1. «O‘tkan kunlar», Abdulla Qodiriy (9-sinf dasturidan)
2. «Kecha va kunduz», Cho‘lpon (11-sinf dasturidan)
3. «Abulfayzxon», Fitrat (11-sinf dasturidan)
4. «Shum bola», G‘afur G‘ulom (6-sinf dasturidan)
5. «Mirzo Ulug‘bek», Maqsud Shayxzoda (8-sinf dasturidan)
6. «Yulduzlar mangu yonadi», Tog‘ay Murod (6-sinf dasturidan)
7. «Yulduzli tunlar», Pirimqul Qodirov (6-sinf dasturidan)
8. «Dunyoning ishlari», O‘tkir Hoshimov (5-sinf dasturidan)
9. «Ruhlar isyoni», Erkin Vohidov (11-sinf dasturidan)
10. «Sohibqiron», Abdulla Oripov (9-sinf dasturidan)
O‘lchov birliklari esa quyidagi shaklda qo‘llaniladi:
1. Santi- old qo‘shimchasi - s – eski shakli, s – yangi shakli
2. Gektar – ga – eski shakli, ha – yangi shakli
3. Akr – ar – eski shakli, a – yangi shakli
4. Massaning atom birligi – m.a.b. – eski shakli, u – yangi shakli
5. Millimetr simob ustuni – mm. simob ustuni – eski shakli, mm Hg – yangi shakli
6. Soat – soat – eski shakli, h – yangi shakli
7. Sutka – kun – eski shakli, d – yangi shakli
8. Kilovatt-soat – kW-soat – eski shakli, kW-h – yangi shakli
9. Amper-soat – A-soat – eski shakli, A-h – yangi shakli
Eslatib o‘tamiz, 23 fevral kuni Davlat test markazi direktori va rahbariyatning boshqa a'zolari bilan Axborot va ommaviy kommunikatsiyalar agentligida matbuot anjumani o‘tkazilgandi. Tadbirda 2019 – 2020 o‘quv yili uchun kirish imtihonlaridagi o‘zgarishlar to‘g‘risida batafsil ma'lumot berilgandi.
