20:25 / 22.03.2020
26425

Benzin narxi oshmaydi, «zapravka»lar ishlashda davom etadi – «O‘zbekneftgaz»

Ijtimoiy tarmoqlarda, Telegram`dagi turli guruhlarda tarqalayotgan, 23 martdan boshlab benzin narxi oshishi, karantin munosabati bilan avtomobillarga yonilg‘i quyish shoxobchalari yopilishi haqidagi xabarlar haqiqatga to‘g‘ri kelmaydi.

Foto: KUN.UZ

Bu haqda «O‘zbekneftgaz» AJ matbuot xizmati Kun.uz’ga ma'lum qildi.

Ma'lum bo‘lishicha, karantin davrida «O‘zbekneftgaz» AJ tasarrufidagi avtomobillarga yonilg‘i quyish shoxobchalarida sanitariya-gigiyena talablariga rioya qilish kuchaytiriladi, koronavirus tarqalishining oldini olish maqsadida yonilg‘i quyish punktlari tez-tez dezinfeksiya qilib turiladi, ammo faoliyatini to‘xtatmaydi.

Karantin davrida «zapravka»larning ish vaqtida ham hech qanday o‘zgarish bo‘lmaydi. Respublika miqyosidagi «O‘zbekneftgaz» AJ tasarrufidagi avtomobillarga yoqilg‘i quyish shoxobchalari to‘liq odatdagi rejimda ishlashda davom etadi.

Shu bilan birga, benzin va boshqa yonilg‘ilarning narxida o‘zgarish bo‘lmaydi.

«O‘zbekneftgaz» AJ tasarrufidagi shoxobchalarda benzin narxi respublika bo‘yicha bir xil bo‘lishi qat'iy nazorat qilinadi.

Energetika vazirligi axborot xizmati rahbari Elmira Bekmurodova ham tarmoqdagi ma'lumotlar asossiz ekanini tasdiqladi.

«Bu yolg‘on xabar. Respublikadagi barcha avtomobillarga yonilg‘i quyish shoxobchalari karantin davrida ham ishlashda davom etadi. Ularning yopilishi haqiqatdan uzoq. Tez orada bu hamda rasmiy bayonot beramiz», deydi u.

O‘z navbatida, «O‘ztransgaz» AJ ham bayonot bilan chiqib, avtomobillarga gaz quyish kompressor shoxobchalariga (AGQKSh – «gaz zapravka») shartnoma shartlariga asosan tabiiy gaz yetkazib berishni davom ettirishini ma'lum qildi.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top