Kun.uz: Navoiy viloyatida 2015 yilning birinchi choragi mobaynida yalpi hududiy mahsulot 3,1 foizga o‘sdi. Bu haqda Navoiy viloyati hokimi, senator Erkinjon Turdimov
ma'lum qildi.
Uning aytishicha, joriy yilning o‘tgan davrida sanoat mahsulotlari ishlab chiqarish 4 foizga, shundan hududiy sanoat mahsulotlari ishlab chiqarish 14,4 foizga, qishloq xo‘jaligi mahsuloti yetishtirish 6,7 foizga, chakana savdo aylanmasi 16,6 foizga va xizmatlar hajmi 16,0 foizga o‘sishi ta'minlandi.
“Aholi bandligini oshirish, xalqimiz turmush darajasini yuksaltirish yo‘lida sezilarli o‘zgarishlarga erishildi. Xususan, bunda viloyatdagi xususiy sektorning ulushi yaqqol sezilmoqda, ya'ni aholi bandligini ta'minlash sohasida 57,8 foizni tashkil etmoqda. Ayni paytda viloyat yalpi hududiy mahsulot tarkibida kichik biznesning ulushi 25,8 foizga yetdi. Joriy yilning birinchi choragida tadbirkorlik sub'yektlari faoliyatini rivojlantirish maqsadida amalga oshirilgan loyihalar samarasida 250 ta yangi tadbirkorlik tarmog‘i tashkil etildi. Bu borada tijorat banklari tomonidan ajratilgan 106,4 milliard so‘m miqdoridagi kreditlar mablag‘lari muhim omil bo‘ldi”, – dedi viloyat rahbari.
Turdimovning ta'kidlashicha, hisobot davrida viloyatda 25 turdagi tayyor mahsulotlar eksporti yo‘lga qo‘yilib, jami eksport hajmi 115,6 million dollarni, shundan hududiy eksport hajmi esa 10,6 million dollarni tashkil etib, o‘tgan yilning mos davriga nisbatan 120 foizga uddalangan.
