Turkiya tashqi ishlar vaziri Mavlud Chovusho‘g‘lining bayonot berishicha, g‘arb mamlakatlarining Rossiya prezidenti Vladimir Putinni yoqtirmasliklarining bosh sababi, uning rostgo‘yligidir. Putin ham Turkiya prezidenti Erdo‘g‘an kabi bor haqiqatni, qilgan xatolari va noto‘g‘ri taxminlarini ularning yuziga ro‘y-rost gapiradi.
“Ular, Rossiya va Turkiyani ikkinchi navli mamlakatlar deb hisoblashadi. Va shu bois, qanday qilib, "bu kabi mamlakatlar" ularni tanqid qilishi mumkin? Ularning fikricha, faqatgina ular har qanday gapni yuzga aytishga haqli, boshqalar emas. G‘arb davlatlari Erdo‘g‘an va Putinning rostgo‘yligiga duch kelishgach, jiddiy xavotir va tashvishga tushib qolishdi”, degan Chovusho‘g‘li.
Turkiya tashqi ishlar vazirining so‘zlariga ko‘ra, toki g‘arb mamlakatlari o‘zlarining qarashi va siyosatini o‘zgartirmas ekan, ular doimo shunday xavotirni his qilishda davom etishadi. Turkiya va Rossiya G‘arb uchun bosh og‘rig‘i bo‘laverishini ular anglab yetishlari lozim.
“Men avvaldan aytib kelaman, yana takrorlayman: buyuk Rossiya uchun bunday munosabatda bo‘lish haqiqatga mos kelmaydi va aqlsizlikdir. Rossiyani qo‘rqitish, kamsitishga urinish, uning hamiyatiga tegish, uni mensimaslik bilan ular hech narsa erisholmasligi aniq. Ayni gapni Turkiya borasida ham aytish mumkin.
Sochi Olimpiadasini yodga olaylik. Sochi-2014 qishki Olimpiya o‘yinlaridek yirik sport bayramida topgan mavzulari jinsiy qarashi o‘zgarganlarning huquqini ta'minlash bo‘ldi. Axir, Rossiya kabi yirik va ulkan davlatning e'tiborini birgina masalaga qaratish, Rossiya sha'niga mos kelmasligini tushunishmaydimi?! Mayli, bu mavzuda chuqurlashishni istamayman. Faqat bir narsani aytmoqchiman, har qanday mamlakat bilan munosabatlar shu kabi tor doiraga bog‘liq qilinar ekan, u hech qanday ijobiy natija bermaydi”, - degan Turkiya tashqi ishlar vaziri Mavlud Chovusho‘g‘li Sputnik Turkiya agentligiga bergan intervyusida.
