2014 yilning mart oyidan dunyo bo‘yicha kamida 127 kishi selfi olish vaqtida halok bo‘lgan. Bunday xulosaga Karnegi-Mellon universiteti tadqiqotchilari keldilar. Bu haqda Mashable nashri xabar bermoqda.
Olimlar selfidan ko‘proq Hindiston fuqarolari halok bo‘lishini aniqladilar. Tadqiqotda ko‘rib chiqilgan noxush voqealarning yarmidan ko‘pi, ya'ni 76 tasi aynan shu davlatga to‘g‘ri kelgan. Bu borada 2-o‘rinni Pokiston egallamoqda, bu yerda 9 kishi selfi oqibatida halok bo‘lgan. Shuningdek, 8 nafar amerikalik, 6 nafar rossiyalik va 4 nafar xitoylik selfi qurboni bo‘lgan.
Ta'kidlanishicha, Hindistonda selfi vaqtida halok bo‘lganlarning aksariyati cho‘kib ketgan.
Odatda ayollar erkaklarga nisbatan ko‘proq selfi olishadi, deb hisoblansa-da, halok bo‘lganlarning 75,5 foizini erkaklar tashkil qilgan. Bundan tashqari, 127 nafar qurbondan 86 nafarining yoshi 24 dan kichik bo‘lgani aniqlangan.
