Samarqand shahrida aholining madaniy hordiq chiqarishi uchun yangi istirohat bog‘lari barpo etiladi va mavjudlarida katta rekonstruksiya ishlari olib boriladi. Bu haqda Samarqand shahar hokimi V.Rahimov 16 iyun kuni jurnalistlar bilan o‘tkazgan matbuot anjumani mobaynida ma'lum qildi.
Qorako‘l Story Engineering mas'uliyati cheklangan jamiyati Cho‘ponota maskani hududida qadimda Amir Temurning mashhur va bahavo bog‘lari bo‘lgan hududda 3 gektarlik istirohat bog‘i barpo etadigan bo‘ldi. Bu borada tegishli qaror qabul qilinib, amaliy ishlar boshlab yuborilgan.
«So‘g‘diyona» istrohat bog‘ining mavjud attraksionlarini yangi, zamonaviy attraksionlarga almashtirish, istirohat bog‘idagi suv havzasini zamonaviy «Akvapark»ka aylantirish bo‘yicha takliflar tayyorlangan.
Tashabbuskor Dobusia MChJ Tashqi iqtisodiy faoliyat «Milliy banki» bilan tarmoq jadvalini ishlab chiqqan. Unga asosan, loyihaning dastlabki qiymati 3,07 mln. dollar, shu jumladan, bank krediti 2,3 mln. dollar va tashabbuskorning o‘z mablag‘i hisobidan 770 ming dollar sarflanishi kutilmoqda. Zamonaviy suv attraksionlari Xitoydan keltiriladi.
Ayni paytda «So‘g‘diyona» istirohat bog‘i hududida qurilish ishlari boshlab yuborilgan. 2018 yilning ikkinchi choragidan boshlab yangi attraksionlarni foydalanishga topshirish mo‘ljallanmoqda.
