«Yandeks» kompaniyasi o‘zining ilk smartfoni – ovozli yordamchi «Alisa»ga ega bo‘lgan «Yandeks.Telefon» smartfonini taqdim etdi. .
Narxi 17990 rubl bo‘lgan qurilma 6 dekabrdan kompaniyaning Moskvadagi do‘konida sotuvga chiqariladi. 7 dekabrdan esa smartfonni «Bera» onlayn do‘koni hamda «M.Video», «Eldorado» do‘konlarida sotib olish mumkin bo‘ladi.
«Yandeks» Yevrosiyo iqtisodiy ittifoqi hududiga «YNDX-000SB» modelidagi «Yandeks.Telefon» smartfonini olib kirishga ruxsat olgandi. Bu ruxsat 2023 yil 25 iyungacha amal qiladi. Qurilmani Shveytsariyada ro‘yxatdan o‘tgan Yandex Services AG ishlab chiqaradi. Bu kompaniya avval «Yandeks.Stantsiya» «aqlli karnayi» ishlab chiqargan. Smartfon dizayni «Yandeks»da ishlab chiqilgan.
Qurilma Android operatsion tizimida ishlaydi. U 8 yadroli protsessor, 5,6 dyuymli, 2160x1080 nuqtali ekran, barmoq izi skaneri bilan jihozlangan va xaridlarning simsiz to‘lovi uchun NFC texnologiyasini, «Yandeks.Dengi» va Google Pay to‘lov tizimlarini qo‘llab-quvvatlaydi.
Gadjyet, shuningdek, turli tashkilotlar kontakt ma'lumotlariga ega «Yandeks.Spravochnik» tizimiga ulangan raqam aniqlagich bilan jihozlangan bo‘lib, foydalanuvchiga smartfondagi kontaktlar kitobida telefon raqami bo‘lmagan biror-bir tashkilotdan qo‘ng‘iroq qilinsa, u qaysi tashkilotdan qo‘ng‘iroq bo‘lganini biladi.
