Birlashgan Arab Amirliklarida Osiyo Kubogi yakuniga yetdi. Finalda Yaponiya va Qatar terma jamoalari bellashdi.
O‘yin teng kurashlar ostida o‘tgan bo‘lsa-da, qatarliklar o‘z imkoniyatlaridan unumliroq foydalanib qolishdi va 3:1 hisobida g‘alaba qozonishdi.
12-daqiqada musobaqa to‘purari Ali Almu'iz qaychi uslubida zarba yo‘llab, Yaponiya darvozasiga to‘p kiritdi. Oradan 15 daqiqa o‘tgach, Hatim uzoq masofadan yo‘llangan zarba natijasida chiroyli gol urib, hisobdagi farqni oshirdi. 69-daqiqada Minamino darvozabon bilan yuzma-yuz chiqib, yaqin masofadan to‘pni uning ustidan oshirib, darvozaga kiritdi. 83-daqiqada Afif penaltini aniq amalga oshirib, yakuniy hisobning 3:1 bo‘lishini ta'minladi.
Natijada, Qatar terma jamoasi o‘z tarixida ilk marotaba Osiyo chempioni bo‘ldi.
Qayd qilish joizki, bahsni hamyurtimiz Ravshan Ermatov bosh hakam sifatida boshqarib bordi.
Osiyo Kubogi
Final
1 fevral
Yaponiya – Qatar 1:3 (0:2, 1:1)
Gollar: Minamino (69) - Almu'iz (12), Hatim (27), Afif (83 pen)
Yaponiya: Gonda, Nagatomo, Tomiyasu, Shiotani, Sakai, Yoshida, Shibasaki, Haraguchi, Minamino, Doan, Osako
Qatar: Ash-Shib, Korrea, Hasan, Salmon, Ar-Roviy, Madibo, Hatim, Xuxiy, Al-Haydos, Afif, Almu'iz
Ogohlantirishlar: Shibasaki (20), Yoshida (82), Sakai (86) - Afif (84), Korrea (90+3)
