O‘zbekiston Prezidenti tomonidan ilgari surilgan besh muhim tashabbusning namunaviy ijrosi Toshkent viloyatining Bo‘ka tumanida tatbiq etilmoqda. Har bir tashabbusning samarali tatbiq etilishiga doir chora-tadbirlar belgilab olinib, 12 aprel kuni Bo‘ka tumani katta islohotlar maskaniga aylandi. Kun.uz muxbiri viloyat hokimligi vakillaridan olingan ma'lumotlar asosida shu haqida xabar berdi.
Bosh vazir o‘rinbosari, Xotin-qizlar qo‘mitasi raisi Tanzila Norboyeva mas'ullar bilan Bo‘ka tumanida islohotlarni jadallashtirish yuzasidan tegishli chora-tadbirlarni belgilab olishdi.
Tanzila Norboyeva tumandagi "Bo‘ston", "Chavlisoy" mahallalarida bo‘lib, yangi tashkil etilayotgan tikuvchilik sexlari faoliyatini samarali yo‘lga qo‘yish orqali 1000 nafar xotin-qizlar bandligini ta'minlash bo‘yicha amalga oshirilayotgan ishlar bilan tanishdi va ijtimoiy himoyaga muhtoj ayollarga tikuv mashinalari hadya qildi, bu ayollarning kasanachilik asosida bandliklari ta'minlanadi.
Mahallalarda ishsiz ayollar Xotin-qizlar qo‘mitasi va Aholi bandligiga ko‘maklashish markazi hamkorligida stipendiyali o‘qishga jalb etilib, kafolatli bandligini ta'minlash choralari ko‘rilmoqda.
Bugunga kelib Bo‘ka tumanida 150 nafar ayol 8 foizli imtiyozli kreditlar bilan ta'minlanib, oilaviy tadbirkorlikning turli yo‘nalishlariga jalb etilmoqda. Asalarichilik, bog‘dorchilik, hunarmandchilikni rivojlantirish uchun berilayotgan imtiyozli kreditlardan beminnat foydalanish imkoniyatiga ega bo‘lgan xotin-qizlar O‘zbekistonda ayollarga ko‘rsatilayotgan e'tibor va g‘amxo‘rlik uchun davlat rahbariga o‘z minnatdorchiliklarini bildirishdi.