Iroqda poytaxt Bag‘dod va ko‘plab boshqa hududlarda mamlakatda tartibsizliklar kuchayayotgani sababli internet to‘liq uzildi. Bu haqda NetBlocks nohukumat tashkiloti saytida ma'lum qilindi.
Ta'kidlanishicha, Bag‘dod, Basra, Karbala va boshqa shaharlarning o‘n millionlab aholisi internetsiz qolgan. Internetning uzilishi norozilik namoyishlari boshlangandan keyin mamlakatdagi eng katta ko‘lamlisi bo‘ldi.
1 oktyabrda Iroqda yomon turmush sharoitlari, ishsizlik darajasi yuqoriligi va korrupsiyaga qarshi namoyishlar boshlangandi. Bag‘dod va boshqa shaharlar ko‘chalariga chiqqan odamlar bosh vazir Odil Abdul Mahdiy boshchiligidagi hukumatning iste'foga chiqishini talab qilishgan. Bir qator joylarda, jumladan Bag‘dodda namoyishlar ommaviy tartibsizliklar va kuch tuzilmalari bilan to‘qnashuvlarga aylanib ketgan. 2 oktyabrda Bag‘dodda internet to‘liq to‘silgan va 11 oktyabrga kelibgina tiklangan. Al Sumaria telekanali internetning o‘chirilishi Iroqqa deyarli 1 mlrd dollarga aylanganini ma'lum qilgan.
