Amerikalik iste'fodagi general-leytenant Stiven Kvast Xillsdeyl kollejidagi nutqi vaqtida AQSh odamni Yerning istalgan nuqtasiga bir soat ichida yetkazuvchi texnologiyaga egaligini aytdi. San-Antoniodagi bazada aviatsiya qo‘mondonligining rahbari bo‘lgan Kvastning bu so‘zlariga The Drive nashri e'tibor qaratdi.
“Bu texnologiya bugunoq yaratilishi mumkin. U istalgan odamni Yerning istalgan nuqtasiga bir soat ichida yetkazish imkonini beradi”, deb aytgan general.
Biroq sobiq harbiy ushbu texnologiya qanday ishlashiga oydinlik kiritmagan.
Nashrning ta'kidlashicha, generalning bu bayonoti boshqa amerikalik harbiylarning ba'zi tushunarsiz hodisalar mavjudligi haqidagi bayonotlari ortida yangragan.
Kvast joriy sentyabrda iste'foga ketgan. Nashrning ta'kidlashicha, bunga sobiq harbiyning koinot texnologiyasi masalalari bo‘yicha aytganlari sabab bo‘lgan bo‘lishi mumkin.
2018 yil aprelda SpaceX kompaniyasi prezidenti Gvinn Shotvell Big Falcon Rocket (BFR) transport tizimi yaqin kelajakda ishlay boshlashi va u odamni bir soatdan kamroq vaqt ichida sayyoramizning istalgan nuqtasiga yetkaza olishini ma'lum qilgandi.
