Guliston shahrida «Cobalt» haydovchisi qarama-qarshi yo‘lga chiqib ketib, kamida 7 yo‘lovchini olib ketayotgan «Damas» bilan to‘qnashishi oqibatida «Damas» haydovchisi va 4 yo‘lovchi halok bo‘ldi, yana 2 kishi shifoxonada,
Bugun, 1 fevral kuni ertalab soat 08:30larda 19 yoshli Sh.B. «Cobalt» avtomashinasida Guliston shahar 4-mavze Guliston ko‘chasi bo‘ylab o‘tgan avtomobil yo‘lida boshqaruvni yo‘qotishi oqibatida yo‘lning qarama-qarshi yo‘nalishiga o‘tib ketib, 21 yoshli S.M. boshqaruvida bo‘lgan «Damas» bilan to‘qnashib ketdi.
IIV huzuridagi Tergov departamentidan ma'lum qilishlaricha, hodisa oqibatida «Damas» haydovchisi S.M., yo‘lovchilari – 55 yoshli Sh.A., 27 yoshli D.E., 28 yoshli M.S.lar voqea joyida vafot etgan. Yana 3 kishi shifoxonaga yotqizilgan.
Shuningdek, 24 yoshli S.A.ga ko‘rsatilgan tibbiy yordamga qaramay, shifoxonada vafot etgan.
Holat yuzasidan Sirdaryo viloyati IIB huzuridagi Tergov boshqarmasi tomonidan Jinoyat kodekining 266-moddasi 3-qismi «a» bandi (Odamlar o‘limiga sabab bo‘lgan transport vositasini boshqaruvchi shaxs tomonidan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Dastlabki tergov harakatlari davom ettirilmoqda.
