Holat yuzasidan O‘zbekiston Respublikasi Jinoyat kodeksining 164-moddasi 3-qismi “v” bandi (bosqinchilik) bilan jinoyat ishi qo‘zg‘atilgan
2020 yilning 7 apreldan 8 aprelga o‘tar kechasi soat 02:00da 33 yoshli J.X. va 26 yoshli M.Sh. spirtli ichimlik iste'mol qilib, mast holatda Buxoro viloyati Qorako‘l tumani Mirpo‘lat qishlog‘ida yashovchi 2-guruh nogironi 47 yoshli O.X.ning yashash uyi yotoqxonasiga eshik oynasini sindirish orqali g‘ayriqonuniy ravishda kirgan.
O‘zbekiston Respublikasi IIV huzuridagi Tergov departamenti xabariga ko‘ra, bu shaxslar uni qo‘llari bilan bo‘yin qismidan bo‘g‘ib, hayoti va sog‘ligi uchun xavfli bo‘lgan zo‘rlik ishlatish bilan qo‘rqitib, pullari va tilla-taqinchoqlarini berishni talab qilib, uning yonida bo‘lgan 100 000 so‘m pullarni talon-toroj qilib, hodisa sodir bo‘lgan joydan yashiringan.
Mazkur holat yuzasidan M.Sh. va J.X.ga nisbatan O‘zbekiston Respublikasi Jinoyat kodeksining 164-moddasi 3-qismi “v” bandi (bosqinchilik) bilan jinoyat ishi qo‘zg‘atilgan, M.Sh. va J.X. gumon qilinuvchi tariqasida jalb qilinganlar hamda o‘rnatilgan tartibda ushlanganlar.
Qayd etilishicha, hozirda dastlabki tergov harakatlari olib borilmoqda.
