Turkmaniston tomoni zarar ko‘rgan hududlarga kerakli yordam ko‘rsatishga, u yerga uskunalar, ishchilarni yuborishga va infratuzilmani tiklashda ko‘mak taqdim etishga tayyorligi bildirildi.
Turkmaniston prezidenti Gurbanguli Berdimuhamedov O‘zbekiston prezidenti Shavkat Mirziyoyev bilan telefon orqali muloqot chog‘ida Sardoba suv omboridagi to‘g‘onning o‘pirilishi natijasida yuz bergan suv toshqinidan jabr ko‘rgan Sirdaryo viloyati tumanlarini tiklashda yordam berishni taklif qildi. Bu haqda TDH xabar bermoqda.
«Yaqinda qo‘shni mamlakatning bir qator shaharlari va aholi punktlariga katta zarar yetkazgan tabiiy ofat munosabati bilan O‘zbekiston xalqiga dalda so‘zlarini izhor etgan prezident Gurbanguli Berdimuhamedov Turkmaniston tomoni zarar ko‘rgan hududlarga kerakli yordam ko‘rsatishga, u yerga uskunalar, ishchilar yuborishga va infratuzilmani tiklashda ko‘mak taqdim etishga tayyorligini ta'kidladi», - deyiladi axborot agentligi xabarida.
Turkmaniston rahbari mamlakatning tegishli idoralari o‘zbekistonlik hamkasblari bilan bog‘lanishga, o‘zaro hamkorlikning tezkor kanallarini yaratishga va tabiiy ofat oqibatlarini tezda bartaraf etish uchun tegishli ish sxemalarini ishlab chiqishga tayyorligini qayd etdi.
