Senat axborot xizmatining xabar berishicha, Andijon viloyatida aholining ichimlik suvidan debitor qarzdorligini qisqartirish maqsadida har bir fuqarolar yig‘inida mahalla faollari hamda deputatlar ishtirokida kichik guruhlar tuzilgan.
Qayd etilishicha, Andijon viloyatidan saylangan senatorlar hamda xalq deputatlari Andijon viloyati kengashining deputatlaridan iborat ishchi guruh tomonidan shahar, tumanlar sektorlar rahbarlarining hududlaridagi ko‘p qavatli uylarni kuz-qish mavsumiga tayyorlash yuzasidan olib borilayotgan ishlar o‘rganilgan.
«Andijon viloyatida jami 1713 ta ko‘p qavatli uy mavjud. Joriy yil iyun va iyul oylarida mahalliy Kengashlar deputatlariga 42 ta santexnika va elektr kommunikatsiyalari bo‘yicha murojaatlar kelib tushgan va ular ijobiy hal etilgan.
Kuni kecha davlatimiz rahbari raisligida o‘tkazilgan videoselektor yig‘ilishida ichimlik suvining tannarxini joylardagi qilingan xarajatlardan kelib chiqib, mahalliy Kengashlar deputatlari va hududiy hokimliklar bilan birga ko‘rib chiqish to‘g‘risida vazifalar belgilangan edi.
Shu jihatdan mazkur viloyat aholisining ichimlik suvidan debitor qarzdorligini qisqartirish maqsadida har bir fuqarolar yig‘inida mahalla faollari hamda deputatlar ishtirokida kichik guruhlar tuzildi», deyiladi xabarda.
Ta'kidlarinicha, aholining debitor qarzdorligini qisqartirish va iste'mol qilingan ichimlik suvi uchun to‘lovlarni oyma-oy undirish bo‘yicha jadval tasdiqlangan hamda uning ijrosi yuzasidan deputatlik nazorati o‘rnatilgan.
