Prezident saylovidan so‘ng Belarusni tark etgan Svetlana Tixanovskaya hukumat va muxolifat muzokaralar boshlaydigan bo‘lsa mamlakatga qaytishga tayyorligini aytdi.
Foto: DPA
"Muzokaralar boshlanganida, barcha siyosiy mahbuslarni qo‘yib yuborishganida, farzandlarim bilan xavfsizlikda ekanligimni his qilganimda Belarusni ozod qilish uchun albatta qaytaman", - dedi u.
Tixanovskaya Bryusselda uni qo‘llab-quvvatlashgani uchun minnatdorlik bildirish maqsadida Yevropada yashaydigan tarafdorlari bilan uchrashdi.
Belarus prezidentligiga sobiq nomzodni qo‘llab-quvvatlash uchun Yevroparlament binosi yaqinidagi Lyuksemburg maydonida o‘nlab kishilar to‘plandi.
Avvalroq Tixanovskaya YeI tashqi ishlar vazirlari va Yevroparlament rahbari David Sassoli bilan uchrashgandi.
Svetlana Tixanovskaya 9 avgustda bo‘lib o‘tgan prezident saylovidan so‘ng xavfsizlik maqsadida Litvaga o‘tib ketgandi.
