Yevropaning 5 ta davlati - Germaniya, Latviya, Litva, Slovakiya va Estoniya Aleksandr Lukashenkoning inauguratsiyasidan keyin ham uni Belarus prezidenti deb tan olmasligini ma'lum qildi.
23 sentyabrda Minskda Lukashenkoning Belarus prezidenti lavozimiga kirishishi marosimi bo‘lib o‘tdi. E'tiborlisi, inauguratsiya oldindan e'lon qilinmagan holda o‘tkazilgan.
“Ushbu marosim maxfiy ravishda tayyorlangani va jamoatchilik ishtirokisiz o‘tgani – juda namoyishkoronadir. Bu marosimdan keyin janob Lukashenko o‘zining qonuniyligiga umid qilmasa ham bo‘ladi”, deb aytgan Germaniya hukumati rasmiy vakili Shteffen Zaybert.
Uning ta'kidlashicha, Belarus prezidenti saylovlari erkin va demokratik bo‘lmagan, Germaniya esa “Lukashenko va uning ma'muriyatidan tinch namoyishchilarga qarshi zo‘ravonlikni to‘xtatishni kutmoqda”. Bundan tashqari, siyosiy mahkumlar qo‘yib yuborilishi va turmalarda qiynoqlarga chek qo‘yilishi lozim.
“U [Lukashenko] Belarusdagi na erkin va na adolatli bo‘lgan prezident saylovlari uchun javobgardir. Slovakiya Belarus fuqarolarini qo‘llab-quvvatlaydi”, deb yozgan tvitterda Slovakiya tashqi ishlar vaziri Ivan Korchok.
Estoniya tashqi ishlar vaziri Urmas Reynsalu Lukashenkoning inauguratsiyasini noqonuniy va demokratiya tamoyillariga zid deb atagan. “Lukashenkoning bugungi noqonuniy inauguratsiyasi demokratiyaning barcha tamoyillariga zid keladi. Lukashenko yaqqol o‘z mandatidan mahrum bo‘ldi. Biz Belarus aholisi o‘ziga munosib bo‘lgan prezidentni olishi uchun erkin va adolatli saylovlar o‘tkazilishiga chaqiramiz”, deb aytgan Reynsalu.
Latviya tashqi ishlar vaziri Edgar Rinkevich esa Lukashenkoning “maxfiy inauguratsiyasi” bo‘lib o‘tgan saylovlarga va Lukashenkoning davlat rahbari maqomiga qonuniylik bermasligini aytgan.
