So‘x tumaniga O‘zbekiston Respublikasi chegara qo‘shini qo‘mondonligi, Davlat bojxona qo‘mitasi vakillari tashrif buyurdi. Bu haqda So‘x tuman hokimligi axborot xizmati xabar bermoqda.
Ta'kidlanishicha, mas'ullarning tashrifdan asosiy maqsadi So‘x tumani hududidagi 8 ta chegara nazorat-o‘tkazish punktlaridagi ahvolni o‘rganish, kamchiliklarni aniqlash va yo‘lovchilarga qulay shart-sharoitlarni yaratishdan iboratdir.
Qayd etilishicha, respublikadan kelgan mas'ullar, tuman hokimi Sayidbahrom Sayidmusayev bilan birgalikda «Malbut», «Soy», «Toyon», «Qizilqiyoq», «Devayron», «G‘aznov», «Tul» va «Lenburg» mahalla fuqarolar yig‘inida joylashgan chegara nazorat-o‘tkazish punktlarini ko‘zdan kechirgan. Nazorat o‘tkazish punktlaridagi kamchilik va muammolarni tez muddatda bartaraf etish va yo‘lovchilarga qulay bo‘lgan sharoitlar yaratib berish bo‘yicha tegishli idora mutasaddilariga topshiriqlar berilgan.