Kecha, 29 aprel kuni AOKAda umumta'lim maktablarining AKT bilan ta'minlanganlik holati yuzasidan matbuot anjumani tashkil etildi.
Tadbirda maktab o‘qituvchilaridan biri ayrim hududlarda o‘qituvchilar maktabga qabul yoshidagi o‘quvchilarning ma'lumotlarini uyma-uy yurib o‘rganishga majbur bo‘layotgani haqidagi savol bilan murojaat qildi.
«Pandemiya sharoitida shu to‘g‘rimi? O‘zi umuman, nega bu jarayon raqamlashtirilmagan? O‘qituvchi o‘zining ishini qilsinmi yo ma'lumot yig‘sinmi?» – dedi savol egasi.
Holat yuzasidan xalq ta'limi vaziri o‘rinbosari Rustam Karimjonov izoh berdi.
«Buning asosiy sabablaridan biri – bizda hozir to‘liq baza yo‘q. Maktab o‘qituvchilarining to‘liq aktual bazasi yo‘q. Bu bo‘yicha 2020 yildan boshlab yagona tizim ishlab chiqyapmiz. Bu borada 9 ta vazirlik bilan birga integratsiya ishlari olib borilyapti.
Bunda to‘g‘ri ma'lumotlar bazasi yig‘ilyapti. Masalan, Adliya vazirligida tug‘ilganlik haqida ma'lumotnoma bo‘ladi. Biz shu orqali ma'lumotlarni yanayam aniqlashtiramiz. Hozirgi kunda ushbu bazaga 2 mln.ga yaqin o‘quvchi ma'lumotlari yuklandi.
Shuningdek, bazaga o‘qituvchilar ma'lumoti ham yuklanyapti. O‘qituvchi va o‘quvchi bir maktabdan ikkinchisiga o‘tsa, biz buni bilamiz. Mana shundan keyin o‘qituvchilar tomonidan qo‘lda qog‘oz yig‘ish holatlari yo‘qoladi», – dedi vazir o‘rinbosari.
