17:46 / 07.05.2021
5442

Toshkentda avtobus va yengil avtomobil to‘qnashuvida 4 kishi jarohatlandi

"Toshshahartransxizmat" “Isuzu” rusumidagi avtobus va yengil avtomobil ishtirokida sodir bo‘lgan yo‘l-transport hodisasi yuzasidan rasmiy ma'lumot berdi.

Qayd etilishicha, bugun, 7 may kuni soat 11:15larda "12-Avtobus saroyi" MChJ tasarrufidagi 130-sonli avtobus yo‘nalishida harakatlanuvchi “Isuzu” avtobusi Sergeli tumani, Nilufar 3-tor ko‘chasi bo‘ylab Nilufar chorrahasi tomon kelayotgan vaqtda, mazkur chorrahada “Matiz” avtomobili avtobusning chap tomoniga kelib urilgan. Natijada, avtobus muvozanatni yo‘qotib, ag‘darilgan.

Dastlabki ma'lumotlarga ko‘ra, ushbu yo‘l-transport hodisasi “Matiz” haydovchisining yo‘l harakati qoidalarini buzishi tufayli sodir bo‘lgan. Mazkur yo‘l-transport hodisasi oqibatida avtobusning to‘rt nafar yo‘lovchisiga tan jarohati yetgan va ular Respublika shoshilinch tez yordam ilmiy markaziga yetkazilib, tez tibbiy yordam ko‘rsatilgan.

Ushbu yo‘l-transport hodisasi qatnashchilariga nisbatan Toshkent shahar IIBB YHXB inspektorlari tomonidan tegishli hujjatlar rasmiylashtirilgan, deyiladi xabarda.

Mavzuga oid
Top