"Air Astana" O‘zbekistonga yangi yo‘nalishlarda parvozlarni amalga oshirish uchun ruxsatnoma oldi. Bu haqda Transport vazirligi xabar berdi.
Ma'lum qilinishicha, "O‘zaviatsiya" agentligi tomonidan 2021 yil 8 iyun kuni Qozog‘iston Respublikasining "Air Astana" aviakompaniyasiga Turkiston – Toshkent – Turkiston va Olmaota – Samarqand – Olmaota yo‘nalishlarida O‘zbekistonga muntazam aviaqatnovlarni amalga oshirish uchun ruxsatnoma berildi.
"Air Astana" aviakompaniyasi "Nur-Sulton – Toshkent - Nur-Sulton" va "Olmaota – Toshkent – Olmaota" yo‘nalishlari bo‘yicha muntazam aviaqatnovlarni amalga oshirish uchun 2010 yil 18 noyabrdagi 78-K sonli ekspluatatsion ruxsatnomasiga ham ega.
Bundan oldin, O‘zbekiston va Qozog‘iston o‘rtasida yangi yo‘nalishlarda aviaqatnovlar yo‘lga qo‘yilishi xabar berilgandi.