Ijtimoiy tarmoqlarda Toshkent viloyatining Bo‘stonliq tumani Oqtosh qishlog‘i hududida 53 tup ko‘p yillik daraxtlar noqonuniy kesilgani haqida xabar tarqaldi.
Ekologiya va atrof-muhitni muhofaza qilish sohasidagi nazorat bo‘yicha Bo‘stonliq tumani inspeksiyasi xodimlari tomonidan olib borilgan o‘rganish ishlari davomida hududda o‘sish holatida bo‘lgan jami 56 tup, shundan, 53 tup shumtol, 2 tup baqaterak, 1 tup qizil do‘lana daraxtlari noqonuniy ravishda kesilganligi aniqlangan.
Toshkent viloyati Ekologiya va atrof-muhitni muhofaza qilish boshqarmasi axborot xizmati xabariga ko‘ra, holat yuzasidan xolis guvohlar ishtirokida belgilangan tartibda dalolatnoma rasmiylashtirilgan. Noma'lum shaxclarning g‘ayriqonuniy xatti-harakatlari natijasida o‘simlik dunyosiga 288 mln 792 ming so‘m miqdorda zarar yetkazilgan.
Bosh prokuror matbuot kotibi - axborot siyosati masalalari bo‘yicha maslahatchisi Hayot Shamsiddinovning ma'lum qilishicha, Oqtosh qishlog‘i hududida ko‘p yillik daraxtlar noqonuniy kesilgani va o‘simlik dunyosiga 288 mln so‘m zarar yetkazilgani holati yuzasidan Jinoyat kodeksining 198-moddasi (Ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atildi.
Avvalroq, Bosh prokuratura hududlarda 30 foizni tashkil etishi lozim bo‘lgan yashil maydonlar 3-4 barobarga qisqarganini ma'lum qilgandi.
Joriy yil avgust oyida bo‘lib o‘tgan yig‘ilishda prezident Shavkat Mirziyoyev Toshkent shahri hamda viloyatlarda daraxtlar va ekinlar pala-partish ekilayotgani sabab qurib qolayotgani, tuman hokimlari obodonlashtirish va ko‘kalamzorlashtirish ishlarini e'tiborsiz qoldirayotganini qattiq tanqid qilgan edi.