O‘zbekistonda 21 yoshga to‘lmaganlarga alkogol va tamaki mahsulotlarini sotish taqiqlanishi mumkin.
Qonunchilik palatasidagi Xalq demokratik partiyasi fraksiyasining navbatdagi yig‘ilishi bo‘lib o‘tdi. Yig‘ilishda “Alkogol va tamaki mahsulotlarining tarqatilishi hamda iste'mol qilinishini cheklash to‘g‘risida”gi qonun loyihasi ko‘rib chiqildi.
Qonun alkogol va tamaki mahsulotlarining tarqatilishini hamda iste'mol qilinishini cheklash sohasidagi munosabatlarni tartibga solish, fuqarolarning, avvalo, 21 yoshga to‘lmagan shaxslarning sog‘lig‘ini alkogol va tamaki mahsulotlarini iste'mol qilishning zararli ta'siridan himoya qilish, shuningdek, jamiyatda sog‘lom turmush tarzini shakllantirish hamda qaror toptirishning tashkiliy va huquqiy shart-sharoitlarini yaratish maqsadida ishlab chiqilgan.
Yangi hujjatda alkogol va tamaki mahsulotlarini sotishning yosh chegarasi 20 yoshdan 21 yoshgacha ko‘tariladi, yetkazib berish va tarqatish bo‘yicha alohida talablar kiritiladi. Alkogol va tamaki mahsulotlarini sotuvchi 21 yoshga to‘lmagan xaridordan shaxsini va yoshini tasdiqlovchi hujjatni talab qilishi, hujjat bo‘lmagan taqdirda esa sotishdan bosh tortishi shart.
Qonun loyihasini ishlab chiqishda, bir qator xorijiy davlatlar tajribasi o‘rganilgan. Jumladan, AQSh va Qozog‘istonda 21 yoshga to‘lmaganlarga alkogol va tamaki sotish taqiqlanishi, Turkmanistonda, Indoneziyada 21 yoshga to‘lmaganlarga, Hindistonning 17 ta shtatida esa 21-25 yoshga to‘lmaganlarga alkogol sotish taqiqlangani inobatga olinib, mamlakatda ham bu borada yoshga doir taqiqni 21 yoshgacha oshirish taklif etilmoqda.
Qonun loyihasi deputatlar tomonidan ma'qullandi.
