Krishtianu «Tottenhem»ga het-trik qayd etdi, Saloh tarixiy gol urdi, Levandovski navbatdagi rekordni yangiladi.
«MYu» Chempionlar ligasi uchun kurashdagi raqobatchisini mag‘lub etdi.
Manchester Yunayted — Tottenhem 3:2
Gollar: Ronaldu (12, 38, 81) — Keyn (35, penalti), Maguayr (72, avtogol).
Manchester Yunayted — De Xea, Dalot, Maguayr, Varan, Telles, Matich (Kavani, 80), Fred, Pogba, Sancho, Reshford (Elanga, 68), Ronaldu (Lindelyof, 83).
Tottenhem — Loris, Doerti, Dayyer, Romero, Devis (Bergveyn, 87), Regilon, Hyoyberg, Bentankur (Uinks, 87), Kulusevski (Moura, 78), Keyn, Son.
Ogohlantirishlar: Dayyer (30), Fred (35), Pogba (85).
«Old Trafford»dagi o‘yin Chempionlar ligasida o‘ynash huquqini beruvchi 4-o‘rin uchun kurash tufayli ham ahamiyatga ega edi. «Manchester Yunayted» bu o‘yinga «Uotfordom»ga qarshi nursiz durang (0:0) va «Manchester Siti»dan yirik hisobdagi mag‘lubiyat (1:4) bilan yetib keldi. «Tottenhem» esa so‘nggi ikki o‘yinda «Lids» va «Everton»ga jami 9 gol urdi va birorta gol o‘tkazmadi.
Antonio Konte o‘yindan oldin «shpor»larning maqsadini aniq bayon etdi. Barqaror o‘yin ko‘rsata olmayotganiga qaramay, jamoa mavsumni kuchli to‘rtlikda yakunlamoqchi.
«Menga «Tottenhem»da ishlash yoqmoqda. Mening maqsadim — raqobatbardosh bo‘lish uchun, g‘alabaga erishish uchun kurashish. Men chin ko‘ngildan shuni xohlayman. Umid qilamanki, biz buni uddalay olamiz. Yanvarda biz vaziyatni to‘g‘rilay olishimiz mumkinligini ko‘rsatdik. Eng yaxshi to‘rtlikda bo‘lish va Chempionlar ligasiga yo‘l olish uchun yanada yaxshiroq o‘ynashimiz kerak», — dedi italiyalik mutaxassis o‘yindan oldin.
«Qizil iblislar»da asosiy yulduz bilan bog‘liq kichik mojaro ro‘y berdi. Rasmiy ma’lumotga ko‘ra, «Siti»ga qarshi o‘yinda Krishtianu Ronaldu bel sohasidagi muammo tufayli o‘ynamagan. U o‘sha o‘yin vaqtida tribunada o‘tirmadi va davolanish uchun Portugaliyaga uchib ketdi. «Shporlar»ga qarshi o‘yinga u tayyor holatda qaytdi va ilk daqiqalardan maydonda harakat qildi.
37 yoshli futbolchi 12-daqiqadayoq jarima maydoni tashqarisidan bergan zarbasi bilan Ugo Loris qo‘riqlayotgan darvoza «to‘qqizligi»ni aniq nishonga oldi. Bu gol portugaliyalik hujumchi uchun 2022 yil boshidan buyon atigi ikkinchi, APLning joriy mavsumidagi 10-goli bo‘ldi. Ronaldu qatorasiga 16-mavsumda turli chempionatlarda kamida 10tadan gol urmoqda.
«Tottenhem» o‘yinga tezda qaytdi va ikkinchi urinishda hisobni tenglashtirdi. Ben Devis tomonidan urilgan birinchi gol o‘yindan tashqari holat qayd etilishi tufayli bekor qilindi. 34-daqiqada esa hakamlar «shporlar»ga yordam berishdi. Deyan Kulushevskining qanotdan bergan uzatmasi Aleks Tellesning qo‘liga tegdi — Harri Keyn imkoniyatdan foydalandi va penaltidan gol urib hisobni tenglashtirdi.
Krishtianu esa to‘rt daqiqa o‘tib yana klubini hisobda oldinga olib chiqdi. Bu golni hisoblash uchun arbitr Jonatan Moss videoassistentlarni eshitishiga to‘g‘ri keldi — assistent Jyeydon Sancho uzatmani qabul qilishdan oldin ofsaydda bo‘lmagani tasdiqlandi. «Tottenhem» jarima maydoniga kirib borgan angliyalik futbolchi to‘pni darvozabon bilan yakkama-yakka holatga chiqib kelgan Ronalduga yetkazib berdi va u faoliyatidagi 806-golni urdi va futbol tarixidagi eng ko‘p gol urgan futbolchiga aylandi.
Ikkinchi bo‘limda «shporlar» uzoq vaqt javob qaytara olishmadi, lekin ularga Harri Maguayr yordamga keldi. «MYu» himoyachisi Serxio Regilonning qanotdan uzatmasini o‘z jamoasi darvozasiga to‘g‘rilab yubordi.
Ammo Ronaldu bunday oqshomda durang hisobga rozi emasdi. 82-daqiqada Aleks Telles burchakdan to‘pni portugaliyalik futbolchining boshiga chiqarib berdi, u esa «ikkinchi qavat»da barchadan baland sakrab, g‘alaba golini urdi. Shundan so‘ng Krishtianu olqishlar ostida maydonni tark etdi, bosh murabbiy qolgan vaqt davomida hisobni saqlab qolishga kirishib ketdi.
Ronaldu futbolchilik faoliyatida rasmiy o‘yinlarda urgan gollari sonini 807taga yetkazdi - bundan avvalgi rekord o‘tgan asrning birinchi yarmida o‘ynagan avstriyalik Yozef Bisanga tegishli edi - uning hisobiga 805 gol yozilgan.
«MYu» yana Chempionlar ligasi o‘rinlari uchun kurashga qaytdi. Seshanba kuni — «Atletiko»ga qarshi o‘yin, bu Ronalduning eng sevimli raqiblaridan biri.
«Liverpul» o‘yinda qolmoqda
Brayton – Liverpul 0:2
Gollar: 0:1 – 19 Dias, 0:2 – 61, penalti Saloh.
Brayton – Sanches, Lempti, Dank, Veltman, Kukurelya, March, Bissuma (Uelbek, 66), Mak Allister, Alsate (Lallana, 46; Gross, 53), Trossard, Mope.
Liverpul – Alisson, Aleksander-Arnold, Matip, van Deyk, Roberson, Xenderson (Milner, 86), Fabino, Keyta (Tiago Alkantara, 65), Saloh (Diogu Jota, 65), Mane, Dias.
Ogohlantirishlar: Bissuma (55), Mak Allister (75), Mope (81), Fabino (84).
«Liverpul»da hozir eng asosiy mavzu — Salohning yangi shartnomasi. Hozircha tomonlar tanaffus qilishgan, ammo klubda qolishni qanchalik istamasin, misrlik futbolchi klub tomonidan taklif etilayotgan shartlarda shartnomani yangilamoqchi emas. Shu bilan birga bu vaziyat uning o‘yiniga ta’sir ko‘rsatmayapti va qizillar yilni yo‘qotishlarsiz davom ettirmoqda.
«Chaykalar» mehmoni bo‘lgan Yurgen Klopp jamoasi kerakli tempda o‘ynadi, Dias esa boshi bilan gol urib hisobni ochdi. Ammo kolumbiyalik futbolchi bu zarbani berishi bilanoq «Brayton» darvozaboni Sanchesga to‘qnashdi va ma’lum vaqt gazonda yotdi, mezbonlar darvozaboni bu harakati uchun jazo olmadi, lekin bu mezbonlarga yordam bermadi. Ikkinchi bo‘lim boshida ular qulay imkoniyatni yo‘qqa chiqarishdi, ko‘p o‘tmay to‘p Bissumaning qo‘liga tekkach, mehmonlar penalti tepish huquqiga ega bo‘lishdi.
11 metrli nuqtaga yaqinlashgan Saloh joriy mavsumdagi 20-golini urdi, bu gol «Liverpul»ning APL o‘yinlaridagi 2000-goliga aylandi.
Hozirda «Liverpul» (28 o‘yinda 66 ochko) «Siti»ni (28 o‘yinda 69 ochko) 3 ochkolik farq bilan ta’qib etmoqda. Gvardiola shogirdlarining 29-tur doirasidagi o‘yini 14 mart kuni «Kristal Pelas»ga qarshi o‘tkaziladi.
Chempionlik poygasi davom etadi, bu poygada «Liverpul»ning chorshanba kuni «Arsenal»ga qarshi kechadigan qoldirilgan uchrashuvi natijasi muhim rol o‘ynashi mumkin. Bu o‘yindan keyin mersisaydliklar «Manchester Siti» bilan o‘tkazilgan o‘yinlar soni bo‘yicha tenglashib olishadi.
Italiya: Shchensni — penaltistlarning qo‘rqinchli tushi
Sampdoriya – Yuventus 1:3
Gollar: 0:1 – 23, avtogol Yosida, 0:2 – 34, penalti Morata, 1:2 – 84 Sabiri, 1:3 – 88 Morata.
Sampdoriya – Falkone, Bereshinski, Yosida, Kolli, Audjyello (Konti, 83), Kandreva, Torsbyu, Rinkon (Trimboli, 83), Sensi (Jovinko, 66), Kualyarella (Sabiri, 62), Kaputo.
Yuventus – Shchensni, Danilo, Rugani, de Ligt, Pellegrini (De Shilo, 85), Kuadrado, Rabo (Aleks Sandro, 75), Lokatelli, Artur, Morata, Kin (Vlahovich, 65).
«Yuventus» to‘rtinchi o‘rinni mustahkamlab (29 o‘yinda 56 ochko), «Atalanta» (27 o‘yinda 47 ochko) bilan masofani saqlashda davom etmoqda. Genuyada turinliklar Massimiliano Allegrining o‘ziga xos o‘yinini — intizomli va pragmatik o‘yinni namoyish etishdi. Mehmonlarning tezkor qarshi hujumlari «Sampdoriya» darvozasini doimiy tahlikada ushlab turdi. O‘yin boshidayoq Yosida Kuadradoning uzatmasini to‘sishga harakat qilib, o‘z darvozasini ishg‘ol etib qo‘ydi, Kolli esa jarima maydoni ichida Moyze Kinni yiqitdi va Morata penaltidan unumli foydalanib, tanaffusga qadar «Yuve» uchun qulay hisobni ta’minladi. Ispaniyalik futbolchini realizatsiya uchun ko‘p tanqid qilishadi, ammo u jamoalariga foyda keltirmoqda, u so‘nggi sakkiz mavsumda kamida 10tadan gol urgan.
«Keksa sinora» hisobni saqlash uchun o‘ynashning hadisini olgan, ammo bu safar o‘yin asabbuzarliklarsiz kechmadi. Shchensni A Seriya o‘yinlarida qatorasiga uchinchi penaltini qaytarib, jamoasini qutqardi, ammo keyinroq «Sampdoriya» rikoshet tufayli hisobni qisqartirishga erishdi. Voqealarning bunday rivojida g‘alaba ikkinchi tomonga o‘tib ketishi ham mumkin edi, ammo mehmonlar nafaqat ustunlikni saqlab qolishdi, balki Morataning o‘tkir burchakdan yo‘llagan zarbasi bilan ustunlikni yanada oshirishdi. Aftidan, bunday tempda «Yuventus» to‘rtinchi o‘rinni saqlashga intilmasdan, uchinchi o‘rin uchun «Napoli»ga qarshi kurash boshlasa ham bo‘ladi.
Milan — Empoli 1:0
Gol: Kalulu (19).
Milan – Menyan, Kalabriya, Tomori, Kalulu, Florensi, Kessie (Dias, 72), Binnosir (Krunich, 88), Tonali, Jiru (Ibrahimovich, 83), Leau (Rebich, 83), Messias (Salemakers, 72).
Empoli – Vikario, Fyamotssi (Stoyanovich, 63), Romanoli, Luperto, Kakache (Parizi, 63), Henderson (Kutrone, 63), Bandinelli (Binassi, 71), Bayrami (Di Franchesko, 71), Jurkovski, Aslani, Pinamonti.
Ogohlantirish: Tonali (90).
«Milan» va «Yuventus» hozirda faqat natija uchun o‘ynamoqda, deyish mumkin. «Rossoneri» ham katta kuch sarflamay, ochko jamg‘arishda davom etmoqda. Fevral oyi oxirida «Salernitana» (2:2) va «Udineze»ga (1:1) qarshi o‘yinlardagi yo‘qotishlarni hisobga olmaganda, barchasi reja bo‘yicha ketmoqda. O‘tgan haftada Neapoldagi g‘alaba jamoani birinchi o‘ringa qaytargandi, «Empoli» bilan o‘yin esa milanliklar yetakchilikni boy bermoqchi emasligini ko‘rsatdi.
Aytish mumkinki, ular 19-daqiqadan boshlab hisobni saqlash uchun o‘ynadi, Kalulu o‘yin boshidayoq hisobni ochdi, Stefano Pioli uchun bu uning boshqaruvidagi jamoalar A Seriya o‘yinlarida urgan 600-gol bo‘ldi. O‘yinning qolgan qismida «Milan» vaziyatlar yaratishda davom etdi, ammo, «Empoli» ham ikkinchi bo‘lim boshida Menyan darvozasini qamal qildi. Ammo milanliklar ko‘p o‘tmay tashabbusni yana o‘z tomonlariga og‘dirishdi. To‘p darvoza atrofidan uzoqlashtirildi va qolganini futbolchilarning saviyasi hal qildi.
Germaniya: «Bavariya» to‘xtatildi
Hoffenhaym – Bavariya 1:1
Gollar: 1:0 – 32 Baumgartner, 1:1 – 45 Levandovski.
Hoffenhaym – Baumann, Kaderjabek (Akpoguma, 74), Fogt, Posh, Grillich, Raum, Baumgartner (Bruun Larsen, 74), Samasseku (Gayger, 61), Shtiller, Ryutter (Bebu, 46), Kramarich (Dabbur, 90).
Bavariya – Noyyer, Zyule, Ernandes, Pavar, Gnabri, Kimmix, Musiala (Zabitser, 81), Myuller (Shupo-Moting, 81), Levandovski, Koman, Sane.
Ogohlantirishlar: Samasseku (30), Grillich (38), Ernandes (44), Ryutter (45), Posh (66).
Zinshaymdagi uchrashuv — bundesliganing navbatdagi turidagi asosiy o‘yin bo‘ldi. «Hoffenhaym» hozirda yaxshi formada va qatorasiga to‘rt g‘alabadan keyin Chempionlar ligasi hududiga yorib kirgan, shu tufayli «Bavariya» uni qo‘rqita olmasdi. Aksincha, mezbonlar o‘yinni shu qadar shiddatli boshlashdiki, debyutdayoq Kramarich hisobni ochishi mumkin edi. Birinchi bo‘limning ikkinchi qismida Raum to‘pni uzoq ustun oldiga tashlab berdi va Baumgartner to‘pga chiqib kelgan Ulrayxni dog‘da qoldirdi.
Lekin bu mezbonlar to‘liq ustunlik qilganini anglatmaydi, tanaffusga qadar «Bavariya» futbolchilari bir marta darvoza ustunini poylashdi, myunxenliklarning ikki goli ofsayd tufayli bekor qilindi. Bo‘limga qo‘shib berilgan daqiqalarda Levandovski burchak zarbasidan keyin darvozani ishg‘ol qildi va bu bo‘limning mantiqiy yakuni edi. Ikkinchi bo‘lim boshida ham amaldagi chempionlarning yana bir goli bekor qilindi va mehmonlarning shashti tushdi.
Bu durangdan xafa bo‘lish uchun «Bavariya»da sabablar ko‘proq. Boshqa tomondan darvozabon myunxenliklarni ikki bor qutqardi. Shuningdek, mehmonlar darvozaboni Baumann ham Sanening og‘ir zarbasini qaytardi, Gnabri o‘z yurishini darvoza ustunini ko‘zlash bilan yakunladi, Myullerning zarbasini darvoza chizig‘i ustida mezbonlar himoyachisi Posh to‘xtatib qoldi. Bu o‘yin natijasi ikkinchi o‘rinda kelayotgan Dortmundning «Borussiya» klubini (24 o‘yinda 50 ochko, «Bavariya» 26 o‘yinda 60 ochko to‘plagan), shuningdek «Hoffenhaym»ning (jamoa 26 turdan keyin 44 ochko bilan 5-o‘rinda) raqiblarini xursand qildi. «Frayburg» (26 o‘yin, 44 ochko) shanba kuni to‘plar nisbatiga ko‘ra to‘rtinchi o‘ringa ko‘tarildi, yakshanba kungi o‘yinlardan keyin «Leypsig» (25 o‘yin, 41 ochko) to‘rtinchi o‘ringa chiqishi mumkin.
Kun statistikasi
- APLda uy o‘yinlarida birinchi bo‘lib 400 g‘alabani qayd etgan jamoa «Manchester Yunayted» bo‘ldi.
- Top-5 chempionatlarida yil boshidan buyon ikki qizil kartochka olgan futbolchi — «Nitssa» himoyachisi Dante.
- «MYu»ning APLdagi o‘yinlarida to‘purarlari ro‘yxatida 4-o‘rinni Krishtianu Ronaldu band etdi, u het-trik evaziga Endi Koul va Rud van Nistelroyni ortda qoldirdi.
- Ronaldu o‘z klublarida qatorasiga 13 yil het-triklar qayd etmoqda.
- «Frayburg» yarimhimoyachisi Grifo bundesligada 2012 yilda debyut qilganidan buyon 15 marta jarima zarbasini golga aylantirdi. Bu Germaniya chempionati ishtirokchilari orasida eng yaxshi natija.
- Germaniya chempionatining joriy mavsumida «Bavariya» hujumchisi Robert Levandovski safar o‘yinlarida 17 gol urdi. U 1973/74 yilgi mavsumda Yupp Haynkes tomonidan o‘rnatilgan va ikki yil muqaddam Verner («Leypsig») tomonidan takrorlangan bundesliga rekordini takrorladi.
- APL o‘yinlarida Saloh 158 (115+43) natijasini qayd etib, Robbi Fauler bilan tenglashdi. «Liverpul» futbolchilari orasida bundan ko‘proq gol va uzatmalar Stiven Jyerrard hisobiga yozilgan (212).
