Toshkent viloyatining Yuqori Chirchiq tumanida o‘qishga kiritib qo‘ymoqchi bo‘lgan universitet xodimi ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Foto: Iqtisodiy jinoyatlarga qarshi kurashish departamenti
Ma’lum qilinishicha, Bosh prokuratura huzuridagi departamentning Yuqori Chirchiq tuman bo‘limi tomonidan Davlat xavfsizlik xizmati xodimlari bilan hamkorlikda tezkor tadbir o‘tkazilgan.
Unda, Toshkent davlat agrar universiteti xodimi F.X. fuqaro Sh.ni ushbu universitetda ishlovchi tanishlari orqali o‘qishga kiritib qo‘yishni 4 000 AQSh dollariga kelishib, shundan 2 000 AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atildi.
Mahkama e’lon qilgan xabarda aytilishicha, hozirgi vaqtda tergov harakatlari o‘tkazilmoqda.
Bundan oldin Agrar universitet sobiq rektori qamoqda ekani ma’lum bo‘lgandi.
