20:13 / 05.07.2022
13969

Mirziyoyev va Erdo‘g‘an telefon orqali muloqot qildi

Turkiya prezidenti O‘zbekiston rahbarining Qoraqalpog‘istonda tinchlik va izchil taraqqiyotni ta’minlash bo‘yicha harakatlarini qo‘llab-quvvatladi.

Foto: Prezident matbuot xizmati

Bugun, 5 iyul kuni O‘zbekiston prezidenti Shavkat Mirziyoyev va Turkiya prezidenti Rajab Toyyib Erdo‘g‘an o‘rtasida telefon orqali muloqot bo‘lib o‘tdi.

Davlat rahbarlari shu yil mart oyida Toshkent shahrida o‘tgan Strategik sheriklik kengashining 2-yig‘ilishida erishilgan kelishuvlar ijrosining borishini muhokama qildi, deyiladi O‘zbekiston prezidentining matbuot xizmati xabarida.

“Turkiya prezidenti davlatimiz rahbarining Qoraqalpog‘iston Respublikasida tinchlik, barqarorlik va izchil taraqqiyotni ta’minlash borasidagi sa’y-harakatlarini har tomonlama qo‘llab-quvvatladi”, deyiladi xabarda.

Suhbatda O‘zbekiston va Turkiya o‘rtasidagi ko‘p qirrali munosabatlarni kengaytirish masalalari ko‘rib chiqildi. 2022 yil noyabr oyida Samarqandda bo‘lib o‘tadigan Turkiy davlatlar tashkiloti sammiti yuzasidan fikr almashildi.

“Davlat rahbarlari yaqinlashib kelayotgan Qurbon hayiti bilan bir-birini qutlab, mamlakatlarimizning birodar xalqlariga farovonlik va ravnaq tiladilar”, deya qayd etilgan rasmiy relizda.

Kecha, 4 iyulda O‘zbekiston va Turkiya tashqi ishlar vazirlari o‘rtasida telefon muloqoti bo‘lib o‘tgan, unda rasmiy Anqara Qoraqalpog‘istonda tinchlikni saqlash bo‘yicha O‘zbekistonning choralarini qo‘llab-quvvatlashi ta’kidlangandi.

Shavkat Mirziyoyev, kecha, shuningdek, Qozog‘iston, Qirg‘iziston, Tojikiston va Yevropa Kengashi prezidentlari bilan ham telefonlashdi.

Mavzu
Qoraqalpog‘istondagi namoyishlar
1-2 iyul kunlari Qoraqalpog‘iston markazi Nukus shahrida tartibsizliklar kuzatildi. Milliy gvardiya xodimlari bilan to‘qnashuvlarda 200 dan ortiq kishi yaralangan, 18 kishi halok bo‘lgan.
Barchasi
Top