AQSh sobiq prezidentining ta’kidlashicha, CNN unga «siyosiy mag‘lubiyat» yetkazish uchun «o‘zining ulkan ta’siridan - go‘yoki «ishonchli» axborot manbasi sifatida foydalanishga harakat qilgan».
AQSh sobiq prezidenti Donald Tramp Amerikaning CNN telekanalini tuhmatda ayblab, ma’naviy zarar uchun 475 million dollar tovon puli talab qildi. 3 oktyabr, dushanba kuni Florida janubiy okrug sudiga topshirilgan Trampning 29 sahifalik da’vosida u «sodiq davlat xizmatchisi sifatidagi obro‘-e’tiborini himoya qilmoqchi» ekani va CNN telekanalini «yolg‘on, tuhmat» tufayli o‘z obro‘siga yetkazilgan zarar uchun javobgarlikka tortmoqchiligi aytilgan. Xususan, da’vogar 2020 yilgi prezidentlik saylovlari demokrat Jo Bayden tomonidan «o‘g‘irlangani» haqidagi bayonoti CNN tomonidan «bu - katta yolg‘on», deb tarqatilgan ma’lumotiga mutlaqo qo‘shilmaydi.
Donald Trampning advokatlari ta’kidlashicha, kompaniya «o‘zining ulkan ta’siridan - go‘yoki «ishonchli» yangilik manbasi sifatida - uni siyosiy jihatdan mag‘lub etish uchun da’vogarni tomoshabinlar va o‘quvchilar ongida obro‘sizlantirishga harakat qilgan». Tramp, shuningdek, CNN telekanalini «siyosiy muvozanatni chap tomonga burish uchun birgalikda harakat qilganlikda» aybladi. Bayonotda aytilishicha, mediakompaniya «irqchi», «rusparast», «isyonchi» va «Hitler» kabi ko‘plab shov-shuvli, yolg‘on yorliqlar yordamida unga tuhmat qilishga uringan». Siyosatchining fikricha, unga nisbatan «tuhmat va haqorat kampaniyasi»ning sababi - CNN 2024 yilgi saylovlarda AQSh prezidentligiga Trampning nomzodi ko‘rsatilishidan qo‘rqishi.
Bundan tashqari, Donald Tramp u va uning advokatlari yaqin haftalar va oylarda, ayniqsa, 2020 yilgi AQSh prezidentlik saylovlarini yoritish bilan bog‘liq holda, «ko‘p sonli boshqa soxta axborot vositalariga qarshi» sudga da’vo qilishi mumkinligini aytdi.
